友邦（ AIA）在保險業的跑數能力數一數二，但其在強積金的表現卻不如人意，買了旗下強積金計劃的打工仔，錢如入了墳墓。（林志謙攝）
財經專題
MPF「散戶級」芬佬 4宗罪
股市波動，膽大的投資者揸現金等機會，膽小的投資者以不變應萬變，兩者都有機會贏。但有一種投資者，一出手就輸硬，他們叫打工仔。
又稱「強迫金」的強積金，實施十六年，打工仔投入並滾存的資產達六千億。這個本港最大的基金群組，近日陸續發出成績表，年初至今，每個打工仔平均唔見萬二蚊。
而最吊詭的是，近年投資環境新常態：風險愈低，回報愈高；債券反而表現最佳。負責操盤的芬佬（ Fund Manager），收你管理費，玩的是分散投資，或直接買落盈富基金。
如果咁易玩，我自己揀都得吧？
散戶級基金經理 強迫指數：★★★★★
打開強積金成績表，點解可以蝕咁多？港股波動，我明，但掌管強積金的好歹都叫基金經理，而且收足錢，但原來表現只有散戶 level。本刊排出各公司的香港股票基金表現，排名第一，不過是倒數，是「友邦尚選香港股票基金」。友邦另一個優選計劃，持股幾乎一樣，只是比例不同，所以表現——一樣的差。一年表現蝕足兩成二，衰過同期恒指跌幅。記者找來此基金分別截至去年五月、八月及十二月的十大持股比較，發現基金竟於五月至八月期間增加滙豐（ 5），佔資產百分比由 4.87%增持至 8.29%。該三個月滙豐股價在七十五元樓上，屬一年高位。相信當時的基金經理如散戶一樣，築起人肉長城「撈底」。其後滙豐股價，輾轉向下。十一月股價跌至六十元左右，竟又減至 5.96%。噢！典型的高買低賣。
去年牛市曇花一現，友邦港股組合基金中的港交所（ 388）、海通（ 6837）摒出十大，無可厚非。但換來的太古地產（ 1972）及石藥集團（ 1093），就令人摸不着頭腦，兩者股價相比去年，又再大幅下跌。再望一望，原來基金經理十一月份增持了中興通訊（ 763）至資產百分比 3.88%。本週一，美商務部下令限制中興通訊在美國的供應商，向中興（中國）出口產品，中興停牌。事實上，早前已有報導指中興通訊疑在多個國家涉貪，持有將會為基金帶來不可接受的風險，故建議從投資組合中剔出，股價比年初已下跌兩成多。究竟友邦基金是否已減持中興？對不起，登入友邦網站，報告只有至去年十二月。資料嚴重滯後，可謂投資大忌。
「智選」盈富基金 強迫指數：★★★★
自強積金半自由行推出，積金局指平均管理費已由○七年的 2.1%降至近期 1.6%。但其實「一分錢、一分貨」，收平了梗係「 hea」做。其中「滙豐強積金智選計劃」內的中港股票基金，基金經理千挑萬選，登登登凳，買入最多達 11.5%的，竟然是盈富基金（ 2800）！其次是大笨象滙控（ 5）。不如我自己揀吧！
有多間發行商，為增加管理費的「競爭力」，索性推出開支成本較低的追蹤「盈富基金」基金。簡單來說，即係「繑埋雙手」，盈富基金（ 2800）買乜，佢就買乜，如富達旗下的香港盈富基金。雖然講到明「直接投資於盈富基金」，但因為要收取管理費，盈富一年跌幅一成三，但投資此類基金卻要蝕近一成八，打工仔只能氣在心頭。
借屍還魂「影子」 plan 強迫指數：★★★★
基金眼光差成咁，如果還自我安慰：「咁多個 plan，我細心揀好嘢。」少年，你太年輕了﹗原來你幫襯滙豐或者恒生的強積金服務，其實大致上都是無分別的，同樣由滙豐出任投資經理。而表面上不同名稱的計劃，原來投資組合可以是一模一樣。滙豐及恒生強積金有四大計劃，包括「易選」、「精選」、「自選」及「智選」，旗下都有設保守基金，看似選擇多，記者翻看他們的頭十大持股，持有的香港及外國銀行定期一樣，就連百分比都是一樣的﹗
另一家信安強積金，有 600及 800系列，旗下都有環球增長基金，環球咁大咁多投資機會，但打開十大持股比例來看，持股及百分比根本就如「 Copy and Paste」，一模一樣。就如香港人選特首，好似有得揀，實質無分別。有研究強積金的經理，踢爆有些公司推出不同名字的計劃，賣的東西倒模般，作用是借屍還魂，「佢推出一個計劃之後，發現表現太差，怕無人買，咪再推另一個俾你揀，用唔同名，搏人唔覺囉！」
揸 cash都可見紅 強迫指數：★★★
強積金表現不濟，積金局都勸將近退休人士，可買保守基金，主要將錢調動為現金或存款，目標是賺取好過紅簿仔利率或相若的回報。不過自己把錢放在大部分銀行，根本不用任何收費，但透過所謂的基金經理幫你，就要收費。根據積金局資料，當中收得最貴的是尚乘旗下的「 AMTD景順強積金保守基金」，開支比率達 1.23%。保守基金在基金界又名 Parking Fund（停泊基金），究竟買啲乜？睇睇強積金報告，基金組合就是分散投資為：永隆存款、永亨存款、富邦存款、滙豐存款等等，你講得出名的香港銀行短期存款都有。各大銀行的短期存款，利息分別只差毫釐，基金經理幫你把錢放在不同的銀行，最大好處，可能是不怕某一間銀行擠提吧！
近年環球低息環境，銀行存款利息自然亦低。 AMTD景順強積金保守基金，收費雖高，其回報過去一年有 0.05%，即每存一千蚊賺到五毫子。這已經比更多保守基金的回報理想。如中銀的強積金保守基金，扣除管理費後，其回報是零﹗放在基金結集成大額存款，利息會高啲？請記住，「保守」並不代表「保本」，過去有基金在扣除手續費後，其回報是負數。你會否覺得把錢放在「枕頭底」無咁嬲？別傻吧﹗你都無得揀。
點樣買 蝕少啲
強積金半自由行已實施三年，根據積金局的資料，計劃至去年為止只有二十八萬份轉會申請，反應冷淡。半自由行所謂「有得揀」，僱員可將自己過去工作的所有供款「轉會」，而現職的供款，就只可一年轉一次，僱主供款部分，依然無得郁。打工仔肉隨砧板上，既然點買都要蝕，點樣可以蝕少啲？
總公司於新加坡做強積金的 Fundsupermart香港總經理黃展威認為，參考以往基金表現最為重要：「積金局成日講，以往表現不代表將來表現指標。但如果過去回報都係蝕錢，仲買？點都要揀表現比基準表現好的基金。」他指可以翻查該基金有否經常轉變組合內容，是否勤力，眼光是否準確。他又指不應只看收費，「指數基金收費平，但無法跑贏大市，後生仔應選擇主導型基金，收費貴但部分表現會相對好。」
雖然現時港股波動，但「轉會」易出錯，事關「轉會期」最長需時八個星期，容易錯失時機，要「轉會」應等市況平靜時才考慮。不過定期檢討不同的投資組合就有需要，「如果之前喺歐美市場獲利唔少，可考慮轉去亞洲市場，因為睇番依家亞洲、中國股市估值，相對較平。」
各地強積金 新加坡最正
台灣
叫強制性勞工退休金制度，僱主供款額不少於僱員月薪 6%，僱員可選擇是否供款。新實施的勞保新制，只要在公司年資滿 15年，退休時可選擇一次過領款或按月領。
澳洲
退休公積金由僱主供款，供款額不少於僱員月薪 9.5%，僱員亦可自願供款，並可獲減所得稅及利得稅優惠，計劃最大特色是可以自行管理，股、債、物業以至藝術品皆可投資，預計 2020年調增至 12%。
新加坡
叫中央公積金。僱主及僱員要供一定金額至退休金賬戶，供款金額分到三個賬戶，分別為普通賬戶（用於購屋、投資、買保險契約、子女教育費等）、醫療賬戶及特別賬戶，成員可因應需要提取公積金。而新加坡行全自由行制，供款當中的 80%，可由成員自行決定如何投資。
撰文：梁佩均、梁延宇
攝影：財經組
攝錄：財經組
插圖：祝健中
ed_bn@nextdigital.com.hk
|
鍾意就快D Share啦！
|
|
|