文詠珊SM裸到盡進擊影后
近年不斷在演技上挑戰自己的文詠珊，早前獻上入行以來最激的一次，接演一個極沉重角色，戲中還需要五花大綁全裸演出，少啲演技都甚難駕馭，難怪她直言開拍前一星期因壓力搞到夜夜失眠！文詠珊近年於影壇的成績有目共睹，今年入圍最佳女配角的她希望不負眾望，將來能憑該角色更上一層樓，向「下一站，影后」進發！
自2007年加入影壇，文詠珊（Janice Man）拍攝過不同類型的電影，近年她不斷挑戰自己，接演一些高難度角色，如去年於電影《赤道》中飾演冷艷殺手，拍打戲毫不錫身，拳拳到肉，連影后舒淇亦曾在微博稱讚，該片更令JM入圍今年《金像獎》的最佳女配角！最近，JM再向自己「下戰書」，接拍邱禮濤執導的懸疑電影《兇手還未睡》，戲中飾演一個心理極複雜、沉重的角色，還有一場全裸被虐戲份！該場全裸戲劇照近日曝光，相片中的她赤裸裸被五花大綁在床上，眼神楚楚可憐，震撼度十足，無論演技、尺度都考驗JM！
壓力大晚晚失眠
面對前所未有的挑戰，JM坦言接拍前經過一番思量：「真係要衝破好多心理關口！接到劇本之後用咗兩個星期去考慮，同導演邱禮濤開咗幾次會，覺得唔想錯過一個咁好嘅角色，所以最後都決定接拍！不過喺開拍前一個星期，我有好多嘢擔心、好忐忑，除咗嗰場戲（指全裸戲）之外，仲會擔心自己究竟駕唔駕馭到個角色呢？點樣可以演到有層次感？總之好多嘢諗、壓力好大，搞到成個禮拜都失眠！」
幸好，失眠最終隨着電影開鏡而慢慢消失，JM最終亦成功演繹角色，連導演邱禮濤都讚好「收貨」。談及那場全裸被虐戲，她坦言拍攝前仍感驚恐，但埋位後便甚麼也不去想，盡情豁出去演：「角色接咗，我就一定要做到最好！拍嘅時候冇特別清場，我只係一心想演好個角色，所以一開機就入咗戲，根本冇時間去諗其他問題，冇尷尬亦冇怯場，每個鏡頭都一、兩Take搞掂，好順利！」
感激拍檔帶入戲
電影中，JM跟林家棟及許志安的關係錯綜複雜，她十分感謝兩人，尤其家棟教了她很多：「佢哋兩個都係好好，依家大家都成為咗好朋友，家棟係一個出色嘅對手，能夠令我好快入戲。」JM近年在影壇的成績有目共睹，深得不少導演寵愛，稍後將接拍由鄭保瑞監製的《狂獸》。今年入圍金像獎的她被問到如此豁出去演出，是否想向影后進發？她躊躇滿志地說：「今次真係豁出去拍，當然希望有成果！好多謝各方導演、電影公司畀機會我。」影壇嶄露頭角，片酬當然升呢，據知JM的片酬已翻一倍，由100萬升至200萬，她笑說：「片酬嘅嘢我唔清楚，交番公司幫我搞，但若果大家想畀鼓勵我，我當然開心！」
文：影視組
|
鍾意就快D Share啦！
|
|
|