前日拍拖10年嘅方力申同鄧麗欣（Stephy）公開宣佈分訊，唔少網民及藝人都大嘆可惜，噚日小方單拖出席活動嗰陣，講到分訊仲兩度灑淚，今日有雜誌報道指Stephy半年前已經搬離佢哋位於碧琥瑤灣嘅愛巢，小方雖然有挽留兼想以旅行箍煲，但最終都挽救唔到呢段10年嘅感情。噚日小方出席活動時，聲淚俱下話同Stephy 3個月前已經有矛盾，雙方都曾經想修補關係，但最終都唔成功，但今日有報道指其實小方同Stephy嘅感情唔係一朝一夕嘅事，佢哋兩個本來都有共識，雖然佢哋近年成日北上拍戲拍劇掘金，但都會爭取時間見面，惟近年Stephy銳意開時裝店做老闆，又有搵到品牌幫佢搞排球隊，為夢想打拼，但反而小方就比較安於現狀，覺得應該留多啲時間畀身邊人，同Stephy諗法有分歧，慢慢就多咗拗撬，喺去年8月佢哋拍攝葉念琛執導嘅《紀念日》更加成為佢哋分手嘅導火線。《紀念日》講述一對夫妻婚後10年，面對雙方感情由激情變平淡，戲中嘅飾演阿寶嘅Stephy因兼顧唔到事業同愛情，經常同飾演阿強嘅小方鬧交，以致鬧離婚。有指戲中有好多內容都係由Stephy同小方提供畀葉念琛，即戲中有好多情節都係佢哋兩人生活嘅寫照，而Stephy更加喺半年前、即拍攝《紀念日》期間已經搬離咗佢同小方喺碧琥瑤灣嘅愛巢，雙方感情步入冷靜期。據知，今次分手其實係由Stephy主動提出，小方都有多番挽留，亦都有嘗試改變，做好多平時唔會喺人前做嘅嘢去冧Stephy，可惜Stephy喺3月頭同Miki、Angela等一班好姊妹，去泰國為Miki婚前搞咗個告別單身trip之後，Stpehy返香港後就喺3月9號，即佢同小方拍拖10周年當日攤牌決定分手，小方雖然唔捨得，但都尊重女友嘅決定，最後喺前日就透過公司太陽娛樂宣佈正式分手，為10年感情劃上句號。
|
鍾意就快D Share啦！
|
|
|
