ViuTv尋晚播出由陳淑蘭（蘭子）主持嘅節目《晚吹-總有一隻喺左近》，就請咗被封為「世紀賤男」嘅周永恒同埋美容達人陳莉敏（QQ）上去，傾「賤格」依為主題。
一開始，蘭子就問對「賤格」有咩睇法，周永恒就話：「我覺得賤格係真實。」蘭子一聽到就追住問：「即係你覺得一啲行為係真實，人哋覺得你賤格，咁真實嘅行為咪好賤格？」周永恒就解釋：「其實有時係賤畀你睇，都可以唔賤畀你睇架。你夠唔夠膽話你冇賤格過？」當蘭子問到會唔會賤到傷害人時，周永恒就開始嚟料，話會首先睇同嗰個人嘅關係先，「再熟啲就賤啲，唔熟點賤畀你睇呀」，蘭子就問係咪「唔熟唔食嘅」，周永恒就話：「賤又未必一定要食咗佢嘅。」
自嘲人渣非自願
而QQ就話對最親嘅人講嘢可以唔使咁絕，愈親愈唔應該賤，佢又話男人就算偷食都唔應該同另一半嘅好朋友搞埋，之後蘭子就講到3P，就問：「坊間話你問過（老婆）依啲問題。」周永恒先話：「你又問我依啲問題呀？」佢就唔答有冇問過，但係之後就話自己未試過3P。
蘭子問到好多人稱佢做賤男，佢點睇時，周永恒就爆大鑊話：「我記得我上次嚟依度時，唔知邊個畀咗封信我讀，話『掂呀，你讀完之後就可以氹番...』。（前妻？）其實我未離婚，前妻又好，冇可以再一齊嘅，未搞掂嘅，anyway喇，佢喇。點知我讀一讀喇，死喇，話我係賤，話我係『人渣』。」蘭子即話佢傻仔：「咁你可以唔讀架嘛！」周永恒話自己當時好「shuffle」，好hurt，之後就問：「shuffle係咪咁用。」之後蘭子就話佢當時接受好幾個訪問都係咁講，寸佢：「你唔係賤格，係笨x。」
當蘭子話要去廣告時，周永恒就爆粗話「昆我上嚟，X街。X街，一坐低兩個o趙x我」，QQ就即叫工作人員唔好CUT機，「Keep roll」。蘭子就話好多雜誌寫佢賤格，而周永恒之後就堅躁底：「女為悅己者容，書就為讀者而寫嘅，你啱啱話你睇嗰幾本書嘅角度點嚟嘅呢，係為咗大眾想睇嘅嘢。我就好細個入行，17歲！我唔鍾意做啲太透過形象，然後去獲取利益嘅嘢。」QQ就話自己一向唔睇娛樂雜誌嘅，但講到周永恒打老婆一事，佢就講到明咁係「賤格」：「郁手就係唔啱！」
唔介意人點睇
周永恒就話：「其實我冇話過自己啱呀，我有講過自己啱咩？」之後就話自己上過兩次法庭，一次有認罪，第二次直情坐咗17日，隔籬間監倉係殺父母嘅殺人犯，而佢就反思咗十幾日，「我係咪需要去到依個地步呢」。周永恒繼續講話唔介意外人覺得佢賤：「最concern係兩個女點睇咋嘛。」佢話雜誌係賣畀八婆睇嘅，所寫嘅賤男，只係娛樂圈架構下嘅賤男，蘭子聽到就即刻話佢唔buy依個講法，因為「空穴來風，未必無因」，而QQ亦話：「又唔見發哥有嘢畀八婆睇。」蘭子即話：「又唔見發哥打發嫂。」周永恒聽完之後，再強調自己唔介意人點睇自己，不過就講到阿Yu：「你知唔知，依個係搖搖板嘅遊戲，坐我對面嘅係阿Yu，我一落佢就上，你想我上番嚟呀，我唔想呀！」佢話唔想阿Yu會唔開心，之後就做咗個拍手嘅手勢：「好簡單，我連依句都唔想講。」蘭子即話唔明佢講乜，QQ都用番周永恒講嘅嘢，話自己聽到「好confused，好shuffle」。
錄影中爆粗走人
之後節目請個按摩師上嚟，講佢遇過嘅賤男，按摩師連講兩個賤男案例，不過就話周永恒賤過佢哋，此時，周永恒就嬲爆企起身話：「唔x玩，走！」爆晒粗行出錄影廠，喺門口同工作人員嘈起上嚟，佢話：「x，唔係咁呀，我上嚟畀你玩咩依家，想點呢依家。」又鬧攝機師：「影乜x嘢呀！」之後就畀工作人員帶咗佢出廠。
點知周永恒又走又唔走，蘭子講緊節目嘅尾tag，佢又走返出嚟坐去梳化，鬧蘭子：「我哋講乜嘢！主持人中立嘅，我發覺我畀兩個女人夾緊啫，我完全唔覺得你係一個中立嘅角度。」蘭子就話同按摩師冇夾過：「你講到我哋屈q你咁樣。」之後周永恒就發晦氣：「你啱，very good呀，我尋晚唔夠瞓咋嘛，對唔住囉。」之後佢直情拎起電話嚟講：「冇呀，走得喇。」蘭子都不忘講句：「多謝晒。」
|
鍾意就快D Share啦！
|
|
|
