條透視晚裝雖然明顯係悉心設計，可惜就係咁出咗事。
每次悉心打扮，都必然掀起熱話嘅時裝終結者鄧紫棋（G.E.M.），今日又有力作！事緣佢出席「第四屆音悦V榜年度盛典」時，以一身華麗（至少佢覺得自己係）透視裝束現身紅地氈。雖然件衫突顯咗佢嘅驕人上圍，遠望亦都好似冇咩嘢，但可惜一放大睇就出事，皆因件衫嘅釘珠立體裝飾，驟眼望落好似一堆蟲爬咗上身咁，真係勁出事，而千千萬萬嘅網民，亦都留言齊嘆頂唔順，分別留言：「身上長蟲子了嗎？」、「我起雞皮了」、「有點密集恐懼症感覺」、「好噁心」、「有點嚇人」、「看得心驚驚」。另外，還有網民留言指G.E.M.咁嬌小，唔應該着條咁嘅裙，因為顯得佢更矮，真係陰公豬。
其實，G.E.M.嘅驚喜又點止咁少，佢喺台上表演時，就換咗另一個Look，化身「粉紫傻豹」高唱搖滾歌曲，期間仲要大晒事業線。不過呢個Look雖然有啲浮誇，不過網民似乎更為受落，有人大讚G.E.M.係可愛嘅性感小野貓，仲有人為佢終於唔再着皮褲而高興。
來源 source: http://hk.on.cc
|
鍾意就快D Share啦！
|
|
|
