如果人生有四季，64歲的顏國樑先生，仍然處於春天。顏國樑，即《香港八一》系列那市儈勢利的「通天經紀」陳積，當年是家喻戶曉的電視紅星，陳積起家，變處景劇御用演員，又拍過《真情》演陳大勝、《皆大歡喜》演石大川 ，二十多年來無間斷拍攝超過三千集電視劇，帶給港人無限歡樂。攀過幾多高山，奈何人生最難翻越的，是生活。因緣際會下，他接觸了太極，慢慢吸收箇中精髓，身體健康了，又結識到一班良師益友。直至08年，顏先生決意淡出幕前，成立了顏國樑趙堡太極拳會，將這國粹發揚光大。電視紅星與太極師傅，同樣是帶給世人正能量，只是換個方式而已。記者：何永寧、余傲芝
攝影：馮峰、Neo、仇志德「太極係求精氣神，人點解會死？就係冇咗精氣神。我哋係養精氣神，咁就長命，就係咁簡單。」面前的顏國樑，以一貫「通天經紀」口脗硬銷，陳積始終是陳積，但原來一晃已經三十年。過慣燈紅酒綠的娛圈日子，08年拍攝完無綫劇《美麗高解像》後，毅然淡出幕前，回歸平淡生活，起初也未能適應這重大轉變。「我以前幾十年嚟起身返工要對住幾十人，最少都有十幾人。依家我基本上開間舖頭仔，賣貓糧狗糧，冇客嘅時候，望下貓糧望下狗糧望下狗，當然唔適應啦，好辛苦架，所以就飲酒！」人生如棋，落子無悔。顏國樑沒有後悔當初決定，他斬釘截鐵的說：「有咩好後悔呢？對我影響又唔大，又幾過癮。我唔鍾意做嘢架，做嘢好辛苦，我鍾意享受。」憶起以往每天開工的日子，尤感偷得浮生半日閒的重要，他續說：「因為以前喺娛樂圈，我哋經常要做宣傳，每逢過節、假期，都要開工。冇家庭嘅，所以好疲倦。」如果世間所有相遇，都是久別重逢，那麼顏國樑接觸到太極，亦肯定有它的意義。「其實當年因為我做過紀律部隊，教我嘅幫辦玩太極嘅。大家係好朋友，亦師亦友，我哋想重聚，但佢嘅時間比較少，因為佢有開班教太極，變相跟佢相聚嘅時間多一啲。」顏國樑發現學習太極後，身體強壯很多，決定持之以恆，08年更成立顏國樑趙堡太極拳會，將太極發揚光大：「太極，一般來說正能量是很強的，希望將這個好的正能量話畀大家知。」亦因為開班教太極，令顏國樑認識到一班好徒弟，心境開朗很多。現在閒時飲番兩杯，間中教教太極，稍後還會開拍處境劇一過戲癮，好不寫意。是電影紅星，還是太極師傅，根本不重要了。「都係一個稱呼、一個代號嚟，冇所謂啦，我改姓陳都已經改了幾十年！唔好加個粗口落去就得。」或者樂天知命，就是顏國樑的太極之道。
|
鍾意就快D Share啦！
|
|
|
