全國人大委員長張德江訪港3日，所到之處保安嚴密，尤其係灣仔，更加畀警方列為核心保安區，周圍都見到20呎水馬，人車嚴禁闖入，搞到附近食店老闆怨聲載道，話生意額大減一半。今朝早，張人大委員大軍殺入將軍澳，探訪安老服務中心，之後再到秀茂坪安達邨視察，佢嘅車隊去到邊封到邊，繁忙時間嗰陣，搞到東廊同觀塘交通嚴重擠塞，返9點嘅打工仔，若果今朝唔係揀搭港鐵，就真係有冤無路訴！前兩日張德江灣仔出巡搞到交通立立亂已經被指「佔領灣仔」，然後又喺科學園逆線行車，今日再次「佔領觀塘」，真係好大嘅官威。又咁講啦，京官訪港，警方要反恐無可厚非，不過阻人搵食、搞到雞犬不靈，就真係好事變壞事。呢幾日，日日喺facebook不斷update呢單新聞嘅邵仲衡，喺張德江訪港第一日，就喺facebook貼咗張新聞相，留言話：「如臨大敵搵個籠困住佢囉不如，懷著心虛接待人，可憐！另一邊，懷著矛盾去”視察”，冇嘢睇到。「9之孖6 真係該煨，為兒為女，自己執贏，睇吓班叫你「融合」嘅契弟送哂自己屋企細路去邊，看著辦！」見留言如見火，係火都嚟嗰種！記者今日打電話畀邵仲衡，佢語氣仲係火火哋咁話：「主要係佢訪港第一日，我太太喺港灣道返工，路封咗，連車位都封埋，搞到要鷹君中心泊day park，唔係錢嘅問題，係擾民嘅問題。其實可能個訪者冇所謂，連內地依家都話嚴禁做啲擾民嘅措施，唔明香港驚啲乜，不過最終拍板嗰個，心胸狹窄又冇遠見，擦錯鞋加上領導無方，勞師動眾去做嘢畀大陸睇，畀國際傳媒見到，成個香港都蒙羞，我身為香港人都蒙羞。我幾十歲人，講呢啲嘢唔怕！」邵仲衡話自己愛國愛港，但經過呢幾日後，有諗過同太太離開香港:「我好鍾意以前嘅香港，我係香港人，即係我姓邵，唔係姓陳，姓王。但過咗呢幾日，同太太商量完，會考慮移民去第二度生活。」
|
鍾意就快D Share啦！
|
|
|
