岑日珈家暴血淋淋 愛犬麵包幾乎甩眼
歌手岑日珈自爆上月初家中發生血淋淋「恐怖襲擊」事件，其最年幼的愛犬「麵包」右眼被另一隻狗仔「笨笨」幾乎咬甩，親眼目睹血肉模糊的情景，嚇得魂飛魄散即飛撲搶救，用雙手擘開「笨笨」個口時，中指被瘋狂咬噬致甩甲，現最憂心是愛犬會失明，而昨晨她受傷的手指又被撞爆要入院做手術，認真「黑到冇朋友」！
歌手岑日珈（Angie）昨晨在社交網Instagram自爆左中指動了個小手術，原來月前她家中發生恐怖「血案」，為拯救4個月大愛犬「麵包」，Angie的手指被另一隻愛犬「笨笨」咬甩指甲，講起當日血腥嚇人畫面，Angie猶有餘悸：「嗰日朝早十一點左右，我喺睡房聽到『麵包』慘叫，即刻飛撲出去，當時『麵包』被『笨笨』咬住，『麵包』隻右眼幾乎甩，仲成地血，但『笨笨』咬住『麵包』啲手腳死都唔放，我好驚佢會咬埋『麵包』條頸，我要用兩隻手撬開『笨笨』個口，所以佢咬甩我手指甲同冇咗忽肉。」
當時Angie懶理十指痛歸心，用紙巾包住血手指後，抱起「麵包」飛奔去獸醫診所，她說：「醫生話要同『麵包』即刻做手術，做咗幾個鐘頭，醫生話好彩『麵包』隻眼啲神經線冇被扯甩，可以將隻眼移番好，但未知睇唔睇得番嘢。」
嚇到震晒喊唔出
昨日她就到診所接「麵包」回家，指表面傷勢已康復得七七八八，但視力仍有待觀察：「佢依家隻眼都唔係好睇到嘢，冇乜反應，但醫生話佢進展良好，再等一個月先知佢視力係點。」又指如果「麵包」隻眼確診失明，將要再接受眼球移除手術，以防壞死組織感染左眼。
每次想起「麵包」受傷血淋淋的畫面，Angie都不期然打冷震，她說：「當時見到成地血，我真係好想嘔，第一次見到咁多血，（有冇嚇到喊？）我係驚到喊唔出，淨係諗要救番『麵包』先。」Angie家中共養了五頭愛犬，她說：「當時隻西施狗『豆豆』好驚，另外嗰兩隻就不停喺度吠。」Angie表示「麵包」在診所住了大半個月：「做完手術後翌日，我用袋帶佢返屋企，將佢安放喺我睡房個籠入面，因為要將佢隔離，唔好令佢傷口再受損，而且佢會驚『笨笨』，所以要分開佢哋。」
甩甲趕入急症室
事後她更將「笨笨」送到訓練學校上堂，因為她覺得「笨笨」的行為出現問題：「『麵包』出事後，我諗過將『笨笨』送畀人，因為驚唔識教佢，但最終都唔捨得，希望佢上完堂會乖啲，我問過醫生同養開哥基嘅朋友，可能『笨笨』跟狗女玩開，佢唔識同狗仔相處。」
禍不單行的Angie，中指本身已經被「笨笨」咬傷，怎料昨晨她搬東西時，可能因為已受傷的指甲太脆弱，她成塊指甲飛甩，當場血流如注，她說：「我自己凌晨兩點飛車去急症室，醫生話一定要插番指甲入去，否則將來唔會再生，結果縫咗四針，依家麻醉藥過咗，真係好痛，十指痛歸心。」為怕家人擔心，做完手術後她先敢告知父母曾入了急症室。
文：音樂組
|
鍾意就快D Share啦！
|
|
|