藝人廖碧兒打從2009年一次到美國之行，命運讓她打開做生意之門，當時由釀葡萄酒開始，慢慢版圖擴展到法國，期間碧兒更走去考品酒師牌，又把釀製的紅、白酒作慈善拍賣及比賽，結果均獲得不錯成績，後來更索性與幾位志同道合的朋友於中環開設酒吧。而家族曾於加拿大開餐廳的她，對飲食業的野心未有停止！
心中有火
一次偶然機會下，碧兒與友人談起想念外國煙熏食物，友人大膽地提議投資中央廚房，更激發起她心中那團火，她說：「我喺加拿大出世同讀書，本身鍾意食steak（排）同burger（漢堡），外國好興食煙熏嘢，但香港嘅餐廳基本上都係要去買番嚟，又或者運過嚟，未必係你想要嘅味道，可以話係冇自己煙熏呢個service（服務），亦冇呢個設施去做煙熏。」
由於這門生意乃一項大投資，從工場選址到食材等也不能草率，單是煙熏爐已近一百萬港元，還要特別從美國訂購，但碧兒與家人商量後認為有得做，最後選址香港仔工廈開設工場，她透露前期花了不少時間，尤其運送煙熏爐時認真被考起，她謂：「呢個爐好大，可以同一時間放5隻燒豬入去，當初送個爐嚟要喺外面吊上嚟，好在呢度唔係好高咋！」
「梗係想做到最好！」
幾位股東對食材的豐富知識，加上本身的人脈，令碧兒減少了不必要的煩惱，她謂：「我有個朋友喺外國有農場，所以會提供肉類畀我哋，三文魚方面，我哋都有用人工養殖，當然我哋亦有其他地方入貨，主要睇個客要求啲咩嘢，盡量滿足佢哋，無論係肉、魚、湯，仲有甜品都可以做到獨一無二，工場日日都有專業嘅人試唔同嘅菜，亦會自己整啲菜式出嚟，好似香腸都會自己做！（想做呢方面一姐？）唔好咁講，決定去做嘅話就梗係想做到最好！」
多重身份
碧兒自言於工場身份眾多，既是老闆、顧問兼宣傳人員，忙的程度可以媲美拍劇時間，她謂：「依家啲客對食嘅要求好高，會問邊味菜配咩酒啱啲，我呢方面知識多啲，所以會畀意見佢哋，亦可以順便供應埋酒，都係生意嚟，所以有時真係忙過拍劇！」更指工場會不定期舉行有限度的肉類及酒類試食日，收費則按份量而定。
碧兒透露現時主力向星級酒店及私房菜供貨，訪問當日，工場便要為某餐廳的派對提供食物，員工將大批龍蝦去殼及烘乾，準備餚製龍蝦湯，她笑謂：「唔好睇落好似好簡單，都要成5個人合作性先做到出嚟！（下一步開餐廳？）遲啲先諗，呢度正式run咗一段時間，但未回本，都用咗好多錢，明白做食嘅生意係要守，所以都冇話畀幾多時間，惟有好努力拍多啲嘢」
餐廳名稱：Crft Pit
開業日期：2015年尾
投資金額：逾百萬元（裝修費、煙熏爐）
員工人數：10位
|
鍾意就快D Share啦！
|
|
|
