保險才俊王傲山前年同前有線主播劉明軒閃婚閃離，回復單身無耐，已經有第二春，佢同任職證券公司嘅Janny Lam一拍即合，仲求婚成功，3月王傲山仲喺FB公佈女友陀猴B嘅喜訊，今日佢哋就喺布吉結婚，正式成為夫婦。今年3月佢接受《蘋果》電話訪問，講到即將做爸爸好興奮：「多謝，Janny！o依家啱啱有咗3個月，預產期係10月，生仔生女我都鍾意，我都心急想BB出世，到時一定陪佢入產房剪臍帶。」換句話講Janny今日係陀住4個月大肚出嫁。本報今日聯絡新郎哥王傲山，問佢點解揀喺布吉結婚，呢個地方係咪有情意結？王傲山話：「因為我哋搵到間酒店叫Paresa，好多個似古堡嘅resort，佢哋有個宣傳好多個天堂裏邊一個最天堂。」碰啱長假期，於是就揀日今日勞動節拉埋天窗?佢話：「我哋會留喺度十幾日放吓假，順便抖吓。」呢次婚禮主要係家人出席，所以王傲山仲搵埋外甥做兄弟。問到婚禮使費使唔使百萬，新郎王傲山話：「咦，唔講錢，咁鬼娘，我係最幸運嘅男人。」
來源 source: http://hk.apple.nextmedia.com
|
鍾意就快D Share啦！
|
|
|
