45歲鍾麗緹高呼「我願意」第三次嫁
現年45歲的「性感女神」鍾麗緹（Christy）與年輕12歲的內地男友張倫碩發展姊弟戀修成正果，前日拍攝真人騷節目時，Christy獲男友驚喜求婚，激動得含淚高呼「我願意！」曾經歷兩段婚姻及育有三女的她，將第三度披嫁衣！
曾經歷兩段婚姻的Christy，去年與內地男星張倫碩參加湖北衞視真人騷節目《如果愛》擦出愛火花，張倫碩向Christy展開猛烈的追求攻勢，終以真誠打動女方，無懼12年的年齡差距發展戀情！兩人不時拍拖放閃，親密關係前日再有突破性發展，張倫碩自編自導自演驚喜求婚騷！
前日，兩人在三亞為新一季節目進行錄影，張倫碩早已安排雙方家長及Christy的兩名愛女到場見證。穿西裝打煲呔的張倫碩請女友坐上台，並與四名友人圍着她跳唱，跳舞後，台上只剩下他與Christy兩人，張倫碩突然拿出戒指並單膝下跪，在鏡頭前及眾人見證下問Christy：「你願意嫁給我嗎？」驚喜交集的Christy激動得用手掩面，呆了一秒後含淚說：「我願意！」兩人立即擁吻，場面浪漫感人。雙方家長及Christy的女兒其後上台跳舞，心情雀躍！
生BB？未落閘
Christy昨日接受《東網》訪問，對於男友炮製驚喜求婚騷，她坦言非常感動：「佢準備咗好大嘅驚喜，佢求婚佢安排呢個求婚籌備咗3個月，我事前唔知發生咩事，真係覺得好幸福！佢私下瞞住我寫咗新歌、排咗舞，仲瞞住我將屋企人，我哋嘅父母、我嘅小朋友、好朋友同閨蜜都請咗嚟，仲組織大家一齊排練，安排晒所有嘢！我特別感動，覺得好浪漫，好貼心，從來冇人為我做過呢啲嘢。我哋上年6月開始拍呢個節目，啱啱好一年後求婚，好奇妙！」問到婚期？她透露仍有工作在身，所以暫未能落實日子：「有部電影要拍，但套戲一直延期，我哋希望10月左右喺北京結婚。（準備好再做媽咪？）呢個就順其自然」
唔睇好？係真愛！
她又激讚未來老公不可多得，非常感恩：「我覺得上天對我好好，畀咗個好男人我。雖然外界唔睇好呢段感情，佢細我12年，但係好成熟，我哋好夾。佢好有責任感，對三個女照顧得無微不至，呢樣嘢打動咗我。」她又表示要感謝節目令她遇上張倫碩，找到真愛：「我覺得愛係冇國界、語言同年齡限制，特別希望大家能夠好似我哋咁，如果愛，勇敢的愛！」至於張倫碩亦留言表達興奮心情：「也很感謝大家這一年來的陪伴，也很開心我們打算一起面對將來，希望大家有機會可以來參加我們的婚禮哈。」
文：名人組
|
鍾意就快D Share啦！
|
|
|
