大家記得由古天樂拍攝嗰部大台劇《神鵰俠侶》裏面，扮演「陸無雙」嘅前大台小花簡珮筠（June）嗎？June仲拍過《笑看風雲》、《大鬧廣昌隆》等經典劇，逃離娛樂圈10幾年嘅簡珮筠現年43歲，原來呢段時間經歷咗兩次小產同被生意拍檔出賣打擊！June接受《蘋果》電話訪問，佢話離開娛樂圈之後，轉做美容生意10幾年：「呢段時間自己一直好努力工作，因為跟以前工作環境好唔同，自己開拓香港、內地市場，紅姑（鍾楚紅）、洪欣、陳玉蓮、葉童、陳法蓉都好支持我，自己好感恩，好多神蹟喺自己裏面發生，一個女人一步一步行咗十幾年，好多辛苦淚水。」其中有5年，為咗生意，簡珮筠搬去上海住，一心諗住與從事美容業嘅葉姓拍檔拍住上，兩人由瑞士品牌做起，越做越大，經營十幾年，銷售到三十幾個國家，一年盈利逾千萬。簡珮筠負責亞洲市場，其拍檔與後來加入嘅梁先生就負責歐洲市場。但公司在全球之商標，都係由簡珮筠申請及擁有。簡珮筠憶述：「呢幾年生意越好，拍檔話希望上市，有人叫我將品牌同公司轉晒佢哋名，因為佢哋負責歐洲市場，我係負責亞洲市場，如果做唔成功可以還原番，我見大家合作咁多年有信任，好天真相信佢哋，但過咗半年見唔到有進展，我要求將啲嘢還原，佢哋話舊公司閂咗，叫我從新嚟過，喺律師樓將公司同品牌轉番我名，呢兩年繼續做生意，我以為冇問題。」以為件事完咗？其實未。去年底，有人又提出上市，簡珮筠稱：「但我經歷上次唔成功事件，心裏面唔係好相信，所以拒絕佢哋，佢哋好憤怒，態度好差，我覺得唔合理，之後返咗香港，去年尾發現自己有BB，有咗一、兩個月，佢哋不停寄騷擾信畀我，講好多唔係事實嘢恐嚇我，自己有咗BB想平伏心情，唔想同佢哋接觸。」嗰段日子簡珮筠心情大受影響，佢好傷心話：「我好唔開心，咁多騷擾信、小動作。我每日都喊，情緒好差，可能咁樣，冇咗BB！當時已經差唔多兩、三個月，好大打擊，我真係好傷心好大傷害。」問到係咪第一胎？簡珮筠話：「第二次！上次有BB係一年幾前，當時我喺瑞士，因為同佢哋有唔同價值觀，大家有少少衝突，去到醫院冇咗！自己因為工作要留喺瑞士，但嗰度朋友唔多，當時好冇助，所以今次有BB即返香港，覺得有好醫療，又係熟悉地方可以好好養胎，估唔到發生呢啲事，唔明白佢哋點解咁做，好多卑鄙手段，唔單止騷擾我，仲有家人！」
|
鍾意就快D Share啦！
|
|
|