掃呢頁CODE去手機

2016年8月24日 星期三

致富智庫:成功企業家玩啲咩?12個人有12度花款 __,

為咗賺多啲錢、躋身成功人士,我哋每日營營役役、披星戴月咁工作。不過邁向成功之路漫長,學識收工之後投入自己興趣係好重要咖!研究發現,彈結他、煮飯仔之類講求創意嘅興趣可以提升工作表現;戶外活動非常有益身心健康;就算普通嘅消閒活動都可以令個人醒目啲。《致富智庫》今期一於帶大家睇睇股神巴菲特等12位成功人士得閒玩開乜嘢,希望大家「WorkHard」之餘,千祈唔好忘記「PlayHard」,有時間盡量做自己鍾 ...


為咗賺多啲錢、躋身成功人士,我哋每日營營役役、披星戴月咁工作。不過邁向成功之路漫長,學識收工之後投入自己興趣係好重要咖!研究發現,彈結他、煮飯仔之類講求創意嘅興趣可以提升工作表現;戶外活動非常有益身心健康;就算普通嘅消閒活動都可以令個人醒目啲。

《致富智庫》今期一於帶大家睇睇股神巴菲特等12位成功人士得閒玩開乜嘢,希望大家「Work Hard」之餘,千祈唔好忘記「Play Hard」,有時間盡量做自己鍾意做嘅嘢!

================

1、世界首富、微軟創辦人蓋茨(Bill Gates)

●玩橋牌

蓋茨一向超級鍾意玩橋牌,據聞同股神巴菲特成為莫逆之交後,巴菲特令佢玩到上咗癮。嘩,世界第一同第四大有錢佬都鍾意玩橋牌,唔識嘅仲唔嗱嗱聲去學!

-----------

2、股神巴菲特(Warren Buffett)

●彈Ukulele

巴菲特不時表演夏威夷小結他(Ukulele)娛賓,原來呢樣係佢幾十年嘅嗜好。佢仲話,當年學Ukulele嘅目的係追女仔!嗯,小妹可以從女性角度話比大家聽,有表演才能嘅男士真係好Charm架(雖然巴菲特啲$$一樣令小記心心眼)。

-----------

3、維珍集團創辦人兼主席布蘭森(Richard Branson)

●下棋

布蘭森出名鍾意衝浪風箏之類冒險刺激嘅玩意,不過佢真正嘅嗜好卻出奇地靜態!呢位英國富豪最大嘅嗜好就係下棋,認為捉棋唔單止集策略、計劃、勇敢同冒險多種運動嘅精神,仲可以嘆返杯茶,同對手吹水可以刷出火花!

-----------

4、雅虎行政總裁邁耶(Marissa Mayer)

●焗Cupcake

邁耶嘅一大興趣係焗Cupcake。佢試過掃一大堆食譜返屋企,逐個逐個Cupcake咁試整,然後整張Spreadsheet列哂啲材料,準備創作自己獨門Cupcake。呢位女強人講得好清楚,焗Cupcake對事業有幫助,不但可以從中發掘睇事物嘅新角度,仲可以結交朋友。

-----------

5、Tesla行政總裁馬斯克(Elon Musk)

●收藏占士邦紀念品

「鋼鐵人」馬斯克嘅前妻話佢冇時間玩,其實佢都有一項興趣,就係收藏占士邦紀念品,三年前特登花差唔多一球美金買部007揸過嘅英國跑車Lotus Esprit。佢講笑話過,要整架真係撳個掣就變身做潛艇嘅車,用Tesla技術。

-----------

6、思科系統創辦人勒納(Sandy Lerner)

●馬上長矛比武

勒納嘅興趣絕對稱得上係今集12位強人當中最獨特嘅,就係騎馬長矛比武,玩時仲要Cosplay古代騎士!啱嘅,商場如戰場,為咗呢個興趣,勒納仲特登喺維珍尼亞州買咗個農場養馬嚟玩呢個活動。

-----------

7、Google創辦人布林(Sergey Brin)

●耍雜技

唔講唔知,原來布林工餘鍾意耍雜技,曾經被傳媒影到喺紐約一個馬戲團上進階班,充分反映佢對高深運動嘅追求,果然係戰鬥民族。

-----------

8、Salesforce創辦人兼行政總裁貝尼奧夫(Marc Benioff)

●禪思

Salesforce係一間市值千億美元、連微軟都食唔到嘅雲端服務商,成就呢間科技巨擘嘅舵手貝尼奧夫,平時原來鍾意禪思減壓。

-----------

9、微軟前科技總監麥爾弗德(Nathan Myhrvold)

●收集恐龍嘅嘢同煮飯仔

呢位仁兄你未必聽過,但超級猛料,佢攞到博士學位,跟過霍金,效力微軟期間開辦咗研發部門,有份創辦嘅公司Intellectual Ventures係美國五大專利持有者之一。佢嘅興趣係咩?收集恐龍嘅嘢同煮飯仔,叻到寫咗幾本攞獎嘅食譜,可見下廚有心得嘅人創意唔會差得去邊。

-----------

10、Twitter暨Square行政總裁杜斯(Jack Dorsey)

●行山

杜斯一人身兼兩間上市科企嘅行政總裁,實忙到死啦,但原來佢一有空餘時間就會出外行吓,每個周六仲會去行山添。嗱,記住放假唔好屈埋自己係屋企啦。話時話,唔知Twitter同Square嘅員工有冇得好似佢咁Work Life Balance呢可。

-----------

11、PayPal創辦人之一蒂爾(Peter Thiel)

●行山與滑浪

現時打理風險投資同對沖基金嘅蒂爾同杜斯一樣,不單止獨具慧眼,而且都係個外向嘅IT人,平時鍾意行山同滑浪,實行「欺山又欺水」。

-----------

12、Apple創辦人之一沃茲尼亞克(Steve Wozniak)

●玩電動平衡車

據講卜戴倫(Bob Dylan)嘅音樂,將沃茲尼亞克同已故教主喬布斯連埋一齊,但阿沃生最近似乎有一個新嘅嗜好,就係玩電動平衡車。

---------------

「東網Money18」全新功能「板塊追蹤」,助你分析抓緊投資先機

http://money18.on.cc/info/liveinfo_industry.html

「致富智庫」領悟理財/職場智慧,一Click改變一世

http://money18.on.cc/wealth


來源 source: http://hk.on.cc
鍾意就快D Share啦!