嚟緊就有Samsung Galaxy Note 7開賣，9月傳聞又有iPhone 7登場，各位係咪已經Ready好換新手機呢？換咗新機，當然要處理舊機，賣咗舊機攞返幾百、幾千幫補下就啱晒！不過舊機有咁多資料，究竟點好？今次就介紹大家賣舊機前必做5件事，輕鬆換機冇難度！
1：轉換/備份舊內容
一般用家換新機，都會想保留舊有嘅相片、WhatsApp對話內容或者聯絡人，賣機前當然要將以上資料統統備份，新機一到手就可以「無縫交接」。相片方面就可以由手機轉移至電腦或者記憶卡，而聯絡人就建議同步至Google帳戶，而WhatsApp就可以將整個帳戶內容直接掟上Google Drive備份，新手機登入同一帳戶就可以進行回復。
2：卡咪Miss
咪以為講笑，原來好多朋友賣機前都會大頭蝦唔記得拔卡，經常出現就係淨係記得拔走SIM卡，而留低咗記憶卡，重要資料隨時因為咁而化為烏有，所以卡槽一定要檢查清空。另外要留意，好多人相片都會預設儲存喺記憶卡上，但部分Apps好似經Instagram拍攝嘅相片其實會儲存喺你手機內，所以記住要一併拉走相關資料。如果想喺新機用返同一張microSD的話，最好插入新機後先進行格式化，確保日後讀取穩定。
3：Android雙Wipe快靚正
之後當然就係要進行俗稱「洗機」嘅回廠設定，一般Android手機都會設有「備份與重設」一欄，要留意係有時廠商會提供不同選項，例如只刪除所有應用程式，而依舊保留短訊、聯絡人等內容，所以一定要揀選類近「清除所有數據」、「清除內部記憶體」的選項。想簡單啲，亦可以有相同洗機效果嘅「雙Wipe」，進入「Android System Recovery」模式，再進行「Wipe cache partition」及「Wipe data/Factory reset」，將手機內所有內容重設。不過，不同品牌手機進入Recovery Mode的方法都有所不同，以Samsung手機為例，完全關機後，同時長按電源、音量+及Home鍵。
至於iPhone，「洗機」前就要記得登出iCloud帳戶，如果用緊iOS 7或之前版本中，登出後就要點選「刪除帳號」，而且最好先將「尋找我的 iPhone」功能暫停。之後就可以順序進入「設定」、「一般」、「重設」、「清除所有內容和設定」，咁就大功告成！
4：Google存取權要刪除
「洗機」之後，最好再用其他手機或者電腦瀏覽器登入「myaccount.google.com」，依順序點選「登入和安全性」、「裝置活動與通知」、「最近使用過的裝置」，將舊機嘅「帳戶存取權」移除，就算唔洗機都存取唔到你嘅Google帳戶資料，安全！
5：安全「洗機」更穩陣
以前曾經有就黑客從已經回復原廠設定嘅手機入面搵返舊資料，的確超得人驚。想再安全啲，Android用家建議喺「設定」、「安全性」、「對手機進行加密」，將機內的所有內容事先加密，之後再回復原廠設定，據講令資料難以回復，不過小記就發現唔係每部機都有相關設定，未必人人啱用。不過其實Android以及iOS都有唔少安全洗機嘅Apps，例如《Safe Eraser》、《iPhone Data Cleaner》等等，雖然驗證唔到效果，但係原廠重設之後再嚟個次洗機，應該穩陣
|
鍾意就快D Share啦！
|
|
|