熱爆娛樂: 【動畫．獨家有片】「小糯米」勁似爸爸楊冪暫留香港湊女親自接送返放學 _

2016年8月30日星期二

【動畫．獨家有片】「小糯米」勁似爸爸楊冪暫留香港湊女親自接送返放學 __,楊冪,劉愷威,小糯米,

其他影片：>>

劉愷威同大陸女星楊冪結婚兩年幾，唔知點解大家都好關心佢哋嘅婚姻狀況，不時話佢哋婚姻亮起紅燈，又話佢哋掛住搵錢，留低個囡囡「小糯米」喺香港比爺爺嫲嫲湊咁。日前仲有周刊報道講到，話小糯米嘅幼兒班畢業，愷威同楊冪都冇影，冇返香港出席囡囡嘅「第一次」畢業禮，但楊冪就神回：「小糯米還沒有上幼兒園，所以不太清楚怎麼會有幼兒園畢業典禮的說法。」(新聞連結：http://bit.ly/2clFDNA )成日話人哋冇影，噚日終於見到楊冪專誠返香港，湊「小糯米」返學去！噚日大約早上8點29分，身穿螢光綠色上衣嘅楊冪抱住囡囡「小糯米」，同行仲有愷威媽媽，一齊送小糯米到達銅鑼灣嘅維多利亞幼稚園，不過未見佢老公劉愷威。當見到傳媒時，校長立即護送楊冪同小糯米入內，全程傍實，楊冪亦一直以身體遮擋鏡頭，以免小糯米被攝入鏡頭。除咗楊冪，之後仲見到薛嘉麟抱住囝囝薛華韜（Arthur）到達，仲一枝箭咁衝入校園，就連老師追住薛嘉麟量度體溫都唔知道，而Arthur就全程伏喺爸爸膊頭，似乎仲未瞓醒咁。其實學校有規例，每位學生返到學校，都要喺學校門外，先用酒精搓手液消毒雙手，除咗小朋友，家長都要俾老師量度吓體溫，先可進入校園範圍，但現場所見楊冪同薛嘉麟就獲得豁免。10點15分左右，戴上太陽眼鏡嘅楊冪同奶奶離開校園，問到囡囡小糯米鍾唔鍾意返學？楊冪話：「她現在已經不會哭。」之前有喊？佢話：「也沒有！」小糯米同小朋友玩得開心？佢表示：「在學校玩得很好，等一下就放學，我有空就回來送她學。」o依家冇工作？佢話：「暫時會在香港，之後一直都在香港。」提到老公劉愷威，楊冪就話佢唔喺香港，返咗大陸做嘢。25分鐘後，楊冪就化咗淡妝同奶奶返番學校，準備接小糯米放學喇，其間，楊冪不停玩手機，愷威媽媽就話小糯米讀學前班，今日唔係第一日返學架喇，之前已經返緊。大約10點45分，家長們可以入內接放學，未幾，楊冪抱住精靈可愛、著住校服裙嘅小糯米步出校園，然後上七人車離開。

楊冪噚日同奶奶一齊湊小糯米返學。(攝影：葉君海)	楊冪噚日素顏咁湊小糯米返學。	楊冪見到記者，校長即護送佢哋入學校。
10點多，楊冪同奶奶先離開學校。	愷威媽媽好友善咁向記者打招呼。	25分鐘後，佢哋又折返學校排隊，準備接小糯米放學。
楊冪抱住小糯米放學。	小糯米其實已開學，今日媽媽湊放學特別開心。	嫲嫲幫小糯米拎書包。
楊冪就護送囡囡，唔想記者影到。	好小心咁送小糯米上車。	薛嘉麟抱住囝囝薛華韜（Arthur）到學校。
Arthur全程伏在爸爸膊頭上。	所有家長同小朋友都要用酒精搓手液洗手先可進入校園，但楊冪同薛嘉麟佢哋就獲得豁免。	睇落小糯米好似愷威多啲！(資料圖片)
楊冪童年相，你話小糯米似唔似佢呢？(資料)