謝安琪同張繼聰06年結婚生仔，10年後嘅今天終於追女成功！
39歲女神謝安琪（Kay）今日終於正式宣布追女成功，湊夠好字！其實阿Kay已經係相隔10年再佗B，阿Kay亦覺得年紀有啲大，凡事都要好小心！雖然依家阿Kay同老公張繼聰事業家庭兩得意，但其實當年兩人都經歷過唔少風波！
被指未婚懷孕
2006年時阿Kay同阿聰突然宣布懷孕3個月，之後兩人喺2007年結婚，囝囝（張瞻）就喺同年6月出世！不過有唔少網民指阿Kay身為基督徒未婚懷孕，不過阿Kay就解釋喺2006年3月生日嗰日，已經同阿聰訂婚！
阿聰「孱仔」變「肌男」
兩人結婚後，阿聰星途平平，仲被稱為「謝安琪老公」，而佢近年仲喺無綫節目《娛樂3兄弟》講起當年事，透露不甘被指「無能」而患抑鬱症，亦曾經諗過自殺！不過，阿聰努力多年，更轉展公仔箱，終於有出頭天，一劇接一劇，演技大受讚賞，更由當年「孱仔」形象蛻變做「肌男」，唔再係「女人背後的男人」，而係擔起頭家做一家之主！
阿Kay人生高峰
而阿Kay生仔後事業更上層樓，2008年一首《囍帖街》更為佢橫掃四台樂壇頒獎典禮各大獎項，歌壇發展一帆風順！近年仲踩過界出演無綫劇《殭》，成功製造熱話！
大方講家事
喺私事方面，佢哋兩夫婦以前一直少講家事，不過仔仔愈嚟愈大，兩人都不時都喺網上晒幸福！阿仔仲喺公開場合表演過，更為媽咪演唱會擔任dancer，完全適應「童星」生活！
今次相隔10年，阿Kay即將再為屋企增添新成員，可以暫時專心安胎做「王后」！不過，相信唔少粉絲除咗期待BB出世，都等住阿Kay復出再創人生高峰呀！
來源 source: http://hk.on.cc
|
鍾意就快D Share啦！
|
|
|
