賭王四房大女何超盈近年做女強人，搞藝術拍賣，仲不時衝出國際，唔係去哈佛演講、去康城影展，就去參加英國皇室嘅活動，真係好international喎。噚日有《蘋果》讀者馮小姐提供咗佢上個禮拜去咗倫敦一個叫Queen Charlotte Ball嘅片同相。喺片入面，超盈着咗一件白色晚裝、戴晒皇冠，手搭實一個燕尾服外籍男入場，之後又換咗另一條黑裙同一班外籍男圍住跳舞，二人手拖手笑晒跳舞。翻查資料，原來呢個Queen Charlotte Ball係倫敦上流社會、成人禮嘅舞會，喺上個禮拜日舉行，當地報紙《每日郵報》（Dailymail）都有報道呢件事(相關新聞： http://dailym.ai/2cZKDrs )，提到係貴族、有名氣嘅二代少女先會獲邀參加，更用到「Princess for a day」標題嚟形容呢班參加ball嘅女仔，當中大合照中大概有17名女仔獲邀，超盈更企正中間，仲有一張相係佢同舞伴嘅甫士相，即係條片同佢跳舞嘅男主角。呢位男仔原來好猛料，《每日郵報》介紹佢係奧地利王子Royal Highness Arch Duke Alexander of Austria，超盈嗰老竇係賭王，計埋條數都算係半個「公主」，呢個組合真係好童話呀。貴為王室成員嘅Alexander雖然名氣就冇英國王室成員咁出名，不過個樣都生得幾靚仔，佢同超盈同年都係25歲，讀過軍校，佢阿爸係Carl Christian係奧地利王子，而阿媽係盧森堡公主Marie Astrid，都算係歐洲王室世界，Alexander就係五兄妹入面排行第四。
