娛樂偵訊
《少女日記》吳美芝轉職治療師 幫過張栢芝蔡少芬關心妍
楊凡執導的《少女日記》，曾被喻為本土偶像電影經典，但女主角吳美芝（ Maygi）之後只多接了一部戲， 18歲的她，要走出去見識世界；退出娛圈由文員做起，繼而發掘容祖兒，成為天后第一個經理人，之後輾轉投身美容界。
十年前，吳美芝以家傳秘方為圈中靚媽修身，客仔包括張栢芝、蔡少芬、唐寧，以及近日生了第一胎的關心妍。
做容祖兒經理人
淡出多年，現年 50歲的吳美芝不但未有走樣，狀態絕對用得上個「弗」字。退出娛圈，做過經理人，之後便全心全意搞美容生意。
「其實當時（《少女日記》八四年）仲有好多人搵我拍戲，但年紀細，想出去睇吓世界，同埋唔想冇晒自由，所以決定轉行。先做文員，之後做卡拉 OK嘅 production，老闆搞咗 Big Echo卡拉 OK比賽，容祖兒贏咗冠軍，我就做咗佢經理人。嗰時容祖兒得 14歲，但一上台，我就知佢會 win。之後我借衫俾佢試鏡，佢又會嚟我 club house游水練大隻，係一個好乖好有 talent嘅女仔。」 Maygi說。
再沾手娛圈事，不愛應酬打交道， Maygi辭去經理人一職，轉到美容界發展並成立 Maygi Beauty。做美容二十年，由始至終，她覺得扮靚 keep弗，才是自己最愛做的工作。
家傳草藥包紮
「我好貪靚，又鍾意天然嘢，做美容最啱！我之前讀咗好多關於自然療法、香薰、按摩之類嘅課程，除咗美容，仲有幫生完嘅媽咪做修身治療，我會同佢哋按摩，然後再用家傳草藥包紮，好多媽咪十五日內就可以回復產前狀態。因為屋企有 organic farm，所以我係用農場入面種嘅草藥，同埋天然嘅油。」
經她一對巧手成功打回原形的圈中媽咪，包括張栢芝、蔡少芬，唐寧及關心妍等，據 Maygi說，張栢芝是個最聽話的媽咪。
「我去到屋企先知個客係張栢芝，一般嚟講，做修身治療每日一定要包住啲草藥八個鐘，但栢芝好乖好忍得，為咗加速有效果，佢會自動加時，甚至包住瞓過夜。我通常會叫啲客預備定一條未有 BB前最闊嘅褲，治療後十五日，幾乎所有人都會著番。
「之前唐寧生第二胎重咗四十磅，佢都可以喺十五日後著番未懷孕前嘅褲。至於關心妍，我覺得佢更容易搞，因為手腳瘦，只係個肚大咗。」 Maygi說。
撰文、攝影、攝錄：娛樂組
化妝、髮型： Ivan Lee
|
鍾意就快D Share啦！
|
|
|
