因為一張流出嘅合照，同埋因為三千蚊港紙嘅騷價，公關界嘅鄭紹康同歌唱界嘅蘇永康爆發咗一場口水戰，而最新發展，係佢哋大家都話搵律師，感覺愈搞愈大咁。
不過呢場戰爭，並唔只係兩個人嘅戰爭，仲有成班花生友加入戰團。話說藝人張致恒喺社交網上載咗呢場「雙康大戰」嘅報道，仲留言話：「買咗大量花生...食完自己種...長食長有啊喂！」而當呢個留言一出，反應就熱烈喇，洪卓立忽然有感而發，突然之間喺度想當年，呢個時候，張致恒都嚟個和應，話自己都好記得。咁意有所指嘅對話，當然引發大家無限嘅好奇心啦，黃偉文就留名話好想知咩事，呢個時候洪卓立就爆料喇，雖然佢冇指名講緊邊個，但係「花生度」絕對爆燈。
洪卓立留言：「話說有人好臨時地叫mani（霍汶希）幫手交人去個中環的酒會還是event，藝人們自己負責妝頭車，都理所當然，因為不紅的藝人需要曝光嘛。其實不求什（甚）麼，就只為門口記者一張多數不登出來的合照嘛。幾個臨時又不紅的演員去到了門口，導演知道你來了，但眼尾都不看你一眼，完全不打招呼，不安排記者拍照，不安排企位什（甚）麼，對白也沒有，當然飯盒也不會有，我猜演員們在門口等了沒有45都有30分鐘，最後幾位臨時演員大膽地自行離開，到今時今日都沒有人『發現』。幾位準備好的臨時演員無用武之地，但離開了，反而滿是歡喜。」
嘩！個故事咁精彩，黃偉文都忍唔住致敬。不過唔代表呢場戰爭就咁完咗，就連張致恒嘅女友莊端兒都加入戰團，唔開名狂鬧人，真係好想知佢哋講緊邊個咯。
莊端兒嘅留言就咁嘅：「大前提係要佢識囉...唔通識如來神掌要話佢知咩！？做人基本禮貌都冇！真係要多謝阿公（蘇永康）！咁多年嚟第一次見咁多人會唔理件事插左（咗）同一個人先。阿公直情型爆唔理之後條友講咩都好啦，條新聞一出咁多人插都知咩事犯眾憎！」
「話說朋友一直同佢公司2位家姐一齊玩開，唔係藝人，咁咩event都係（喺）vvip入面玩，咁好多時仲一齊食野（嘢）添，唔知你咩人，家姐係到（喺度）又見你一齊食野（嘢）咪搵話題R水吹囉！家姐唔係到（喺度）你又唔係紅星即刻變臉囉！做得佢主人d朋友都唔差得去邊講真佢自己主人嘅朋友都唔俾（畀）面，幾廿歲人要俾（畀）人開名仲要加圍插！檢討下（吓）」
嘩！真係成地花生喎...不過唔好意思，呢啲花生碎好快就畀人清理咗，話說張致恒已經將呢個post delete咗...佢點解咁做呢？又真係幾耐人尋味喎。
|
鍾意就快D Share啦！
|
|
|