【短片】【真係好大隻啊！】唔識欣賞囡囡一身肌肉 翁靜晶：我都唔認得係佢
2016-09-01 21:15:00 HKT
呢個背影，有另一種美
真係要日日操先得
翁靜晶嘅囡囡除咗有個法律系學位，仲有一身肌肉，今日翁靜晶就喺facebook貼咗幾張囡囡嘅相，張張都係筋肉人咁，真係大隻過唔少男人。
《蘋果》今日致電翁靜晶，透露相片及video都係由囡囡send畀佢睇，佢話﹕「好似一個少林寺18銅人咁嘅效果，係好黑囉，第一次收到張相，我話『呢個非洲人係邊個嚟架，咁我都唔係好認得係佢』。」
翁靜晶直認係傳統女性，對女人美嘅標準應該係肥肥白白同有啲肉，所以一直唔識欣賞囡囡嘅健美身形，佢話﹕「或者係我老土啦，始終舊式人。但諗番轉頭，如果我一路唔去面對佢呢個決定，就好似唔支持佢啦。我一路都冇post出嚟，今次post出嚟都係一個認同，我都覺得為佢驕傲嘅。可以好肯定，一個人要練到一身銅皮鐵骨要經過一個好長及克制經歷，佢又要節食同做好多運動，係一種毅力表現。」
問到囡囡最終有冇攞獎？翁靜晶話﹕「佢第一次參賽，有第二個call out，但最後唔可以贏出，始終同外國女子比賽，佢已經好叻。仲有玩舉重呢，我諗佢學功夫應該唔錯。」
依家女大女世界，翁靜晶話難得幸儀未婚夫Roberto都係健身先生，佢話﹕「佢哋覺得靚就得，個男仔都係成身腹肌，有咩人魚線，我都係最近學。但我最擔心佢(幸儀)套婚紗已經買咗，但肌肉愈嚟愈勁，會唔會唔啱着呢？要改幾多次呢？我就唔知嘞。」
翁靜晶透露囡囡婚期已定於2018年，佢笑話﹕「外國人習慣要女家畀錢擺酒，我o依家都努力籌款，各處鄉村各處例，要返意大利擺，聽聞酒水就男方出，但都計唔到咁多，總之能力範圍之內。」問到大女萬儀有冇著落？佢笑笑口話﹕「千祈唔好又揀外國人，貼埋大床咁滯，兩個都要籌錢嫁，希望嫁中國人咪收禮金囉。」
來源 source: http://hkm.appledaily.com
|
鍾意就快D Share啦！
|
|
|
