千億新抱徐子淇用咗半年時間籌備智行基金會籌款晚宴，今晚同老公李家誠恩愛現身，仲一齊受訪，唔只一身行頭，連兩公婆嘅親蜜舉動都特別閃過人。今年7月兩夫婦喺美國環球影城，被《蘋果》讀者「爆相爆片」影到變接吻魚連環激嘴（相關新聞： http://bit.ly/29RIgCY ），問到係咪全家去慶祝結婚十周年？子淇解釋：「小朋友暑假啫。」咁年底十周年點慶祝？子淇話：「同好熟朋友慶祝，未必喺香港。」跟住指一指老公，甜絲絲話：「佢搞啦。」問到兩個當眾做接吻魚，係咪計劃想生第五胎？子淇嬌嗲話：「其實都好尷尬，喺美國冇睇新聞，第日起身好多人打嚟笑我哋，其實我哋喺香港好小心，去到外地諗住輕鬆啲，冇諗住有人認得。」會唔會戒街頭親熱？子淇表示：「其實都好少，都係正常兩公婆會做嘅嘢。」佢仲諗計搶「爆相爆片」，打算出高價利誘：「聽朋友講啲人喺街影相可以賣到報館，其實你哋影到相可以賣番畀我，我畀多過報館少少錢。」
來源 source: http://s.nextmedia.com
|
鍾意就快D Share啦！
|
|
|
