去年亞洲幾乎每3日就出一個身家百億港元嘅富豪，仲大部分係白手興家添。咁落去，好快輪到你。
話說瑞銀同羅兵咸永道嘅調查發現，即使去年經濟麻麻，但全球仍然有210人嘅資產值，成功跨過10億美元門檻，進身億萬富豪，計落條數，即係身家接近或者過100億港元！
呢批新進富豪當中，亞洲佔113人，用一年365日計，亞洲幾乎每3日就有1個億萬富豪誕生，相當架勢。中國更加可以用「一枝獨秀」形容，足足有80個新億萬富豪來自中國，平均年齡53歲；香港都唔輸蝕，舊年出產咗11個新億萬富豪。
唔好以為新億萬富豪一定係「靠父幹」，報告話大部分人都係白手興家嘅富一代。搞邊行生意，可以白手興家搞到過百億港元身家？報告話，班新進富豪主要嚟自科技、零售消費及房地產業。
事實上，全球有三分一嘅億萬富豪已經年屆70歲以上，估計富二代會喺未來20年內「上位」接手家族企業，移交金額高達2.1萬億美元。2.1萬億美元有幾多？相當於印度去年嘅國內生產總值，真正係「富可敵國」級數。
分析仲話，雖然中國經濟放緩，但出產億萬富豪嘅潛力仍然極大。嗱睇埋新鮮熱辣出爐嘅2016年《胡潤百富榜》就知有幾爆，內地企業寶能系舵手姚振華就係最佳佐證，事關佢一年內身家急漲近10倍，係榜內由第231位爆上第4位。驚人冇！
亞洲富裕人士除咗增長快，投資取態亦比較特別。顧問公司Capgemini研究發現，相比其他地區，亞洲富裕人士鍾意自己一手一腳管理投資，多過搵專業人士幫手；佢哋仲特別鍾意見到、摸到自己嘅資產，所以有15.4%嘅人愛揸Cash。
睇到呢度，唔怕老套講句，「貧者愈貧，富者愈富」呢句話係真嘅；之但係，喺亞洲零舍易發達，亦係真嘅；上面提到嗰啲百億元身家，大部分係無父幹下，靠白手興家搞出嚟，呢個更加係真，真，真。所以都係嗰句，好快輪到你做億萬富豪。
─ ─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機http://money18.on.cc/info/liveinfo_industry.html
「致富智庫」，領悟理財/職場智慧，一Click改變一世
http://money18.on.cc/wealth
|
鍾意就快D Share啦！
|
|
|
