現年57歲嘅吳岱融，雖然家陣添咗啲歲月嘅痕跡，佬味濃，但當年只得廿幾歲嘅佢，迷倒過唔少女性粉絲，曾經有傳媒用「第一帥」嚟形容佢，唔講得笑。吳岱融原名吳槐岸，嚟自新加坡，喺80、90年代當紅嘅無線小生，而早喺80年代初，佢已經喺新加坡電視圈已經闖出名堂，主演過極具影響力嘅電視劇《人在旅途》。到1987年，吳岱融轉到香港發展，演過《絕代雙驕》、《邊城浪子》等港劇，同時令佢聲名大噪，其古裝造型更多獲好評。可惜到咗90年代初，因吳岱融為個人唱片宣傳喺友台亞視亮相，咁就激嬲咗「方丈」，令佢遭大台雪藏，唔單止冇得做小生，後來更遭解約。之後吳岱融轉向大銀幕發展，更與現任太太鍾淑慧先後喺《孽殺滅門慘案》及《替天行道之殺兄》等三級電影中合作，其中吳岱融更喺《替》片中大膽挑戰三級極限露下體上陣，非常大膽。其後吳岱融再北上拍劇，亦有到台灣及返家鄉新加坡演出，至近年先返香港發展。其實吳岱融演而優則導，喺1994年執導嘅處男作《奪命接觸》，由鍾淑慧、歐陽震華等人主演，吳岱融亦有登場，當年錄得507萬港元票房，算係唔錯嘅成績。其後佢都有執導過《趕盡殺絕》同《靈異鬼世界》等電影，部份仲自導自演。吳岱融喺1995年迎娶鍾淑慧，之後返咗新加坡居住，之後又去過台灣同內地居住，到幾年前先回流返香港。吳岱融同鍾淑慧育有一子吳政樺，現年19歲嘅吳政樺更因為到當兵年齡，所以鍾淑慧就返新加坡住，方便照顧兒子。吳岱融除咗演藝圈工作外，佢亦有喺大陸任職私人顧問，瓣數唔少。
|
鍾意就快D Share啦！
|
|
|
