2016年10月1日 星期六

香蕉仔進修升呢財務策劃師 鄧一君拒返娛圈「我唔鍾意應酬」 __,鄧一君,

香蕉仔進修升呢財務策劃師 鄧一君拒返娛圈「我唔鍾意應酬」鎂光燈下的世界五光十色,不少人目眩神往,憧憬成為偶像大紅大紫,但卻有人體驗過後甘於平凡,寧願轉行重頭做起。《記得…香蕉成熟時》的香蕉仔鄧一君,如今是個快將40歲的中年,十一年前他為前途轉行,由保險從業員做到今日分行經理及高級財務策劃師。為保專業形象,一君揚言不會再演戲,並指自己不喜演藝圈應酬活動。說到中年發福,他笑謂:「肥咗畀人個感覺仲敦厚咗 ...


香蕉仔進修升呢財務策劃師 鄧一君拒返娛圈「我唔鍾意應酬」

鎂光燈下的世界五光十色,不少人目眩神往,憧憬成為偶像大紅大紫,但卻有人體驗過後甘於平凡,寧願轉行重頭做起。《記得…香蕉成熟時》的香蕉仔鄧一君,如今是個快將40歲的中年,十一年前他為前途轉行,由保險從業員做到今日分行經理及高級財務策劃師。為保專業形象,一君揚言不會再演戲,並指自己不喜演藝圈應酬活動。說到中年發福,他笑謂:「肥咗畀人個感覺仲敦厚咗穩重咗,生意仲好咗!」



■39歲的鄧一君棄影後轉行做保險,現為分行經理及高級財務策劃師。攝影:林德雄

本月24日便踏入男人四十一支花之齡的鄧一君,9歲開始做童星做到成年,在娛樂圈打滾足足二十多年,香港電影業的輝煌、港產片的不景氣都見證過。不過,一君日前在觀塘接受專訪時,坦言自己不愛演戲,當年入行拍戲,也是為了方便看明星,一君說:「你哋睇明星好辛苦,又要喺出面等,我直頭喺佢隔籬幾方便呀!」



【9歲入行】

■鄧一君9歲便開始為香港電台拍教育電視。電視圖片



【成名電影】

■《記得…香蕉成熟時》中飾演的楊醒波,是一君的演藝代表作。

毅然撇無綫轉行一君當年憑《記得…香蕉成熟時》「楊醒波」一角提名香港電影金像獎最佳新演員,演藝圈起步看來不錯,他說:「係呀,當時都覺得自己掂,有部戲紅咗,可能因為咁,自己冇咗危機感,當時紅咗有好多機會,但自己冇去好好把握,加上我外形太局限,而且我唔鍾意應酬,又要去卡拉OK、飲嘢,成日唔見我,搵親我又唔出,又掃興,一係早走,可能會蝕底啲。」2005年,正為無綫拍劇的一君考慮到電視台發展及前景不樂觀,甚至缺乏安全感,為了想擁有自己事業,一君經朋友介紹下轉投保險行業,十一年間,他已被擢升為分行經理及高級財務策劃師。

當年不愛讀書的一君,為了事業更報讀相關課程裝備好自己,他說:「我發覺我真係開咗竅,我𠵱家做管理,有啲管理嘅技巧唔夠,咁就自己去進修工商管理,讀咗個master,而最厲害係呢個『CFP認可財務策劃師』,全香港得三、四千個人有。」近年一君身形發福少少,對此他笑謂:「因為𠵱家唔使出鏡,所以我就冇keep,同埋𠵱家肥咗,畀人個感覺仲敦厚咗穩重咗,生意仲好咗,如果我瘦番,反而似個死𡃁仔咁,仲衰呀!」



【古仔細佬】

■一君在劇集《烈火雄心》演古天樂(右)的智障弟弟,二人因合作而成好友。



■一君熱愛現時工作,揚言不會重返演藝圈拍戲。

「古仔好有義氣」一直有傳古天樂是他首名顧客,對此一君不便多說,但表示現時仍有跟古仔聯絡:「古仔係我一個好好嘅朋友,轉行前同轉行後佢都好支持我,佢係個好有義氣、好肯幫朋友、關心朋友嘅圈中人。」

離開演藝圈多年,一君雖然偶爾戲癮發作,但他從沒想過再走演員路。他解釋說:「拍戲始終時間好長好辛苦,同埋都唔想畀人感覺好唔專注、好唔專業。」一君表示當他戲癮發作時,就會跟幾個志同道合的朋友一同拍攝短片來「頂癮」,如六年前他自編自導了一齣約19分鐘微電影,於其社交平台上播放。

採訪:譚倩宜、黃曉妍

【童星出身】曾獲提名最佳新演員39歲的鄧一君,9歲便入行,最初替港台拍教育電視,一拍就五年,之後有機會轉到大銀幕發展,首部電影是《縱橫四海》演周潤發童年,當時連哥哥張國榮亦看好他。1993年擔正演《記得…香蕉成熟時》「楊醒波」一角,更令他獲提名94年香港電影金像獎最佳新演員,之後就再有機會拍《記得…香蕉成熟時II初戀情人》、《記得…香蕉成熟時III為你鍾情》等。

除了電影,鄧一君轉行前曾替無綫拍劇,包括《美味天王》演歐陽震華徒弟 、《烈火雄心》演古天樂的智障細佬及《刑事偵緝檔案》系列等。



昔日的香蕉仔鄧一君,現在已是一位財務策劃師。



一君指現時的工作,比以前於娛樂圈更有前景。



他有二十多名下屬。



以前不愛讀書的一君,轉行後再次重回校園,現在已有一個碩士學位。



一君跟盧愛倫現時還有KEEP住見面。



一君透露盧愛倫現時於投資銀行擔任後勤工作。

 


鍾意就快D Share啦!
Related Posts Plugin for WordPress, Blogger...