品牌為咗宣傳，除咗喺媒體落廣告，將產品送俾藝人都係一個唔錯嘅選擇，而藝人收到品牌送嘅禮物，通常都會好識做喺社交網站貼下相，多謝下個客！不過呢，如果人家送禮俾你，連產品係咩都搞錯，又真係好蝦碌喎！就好似周麗淇咁，噚日喺instagram貼咗一盒國際大品牌送俾佢嘅一盒六支裝嘅唇彩，無錯！無睇錯，真係一盒唇彩！之但係周麗淇就咁話喎：「我很想塗指甲油，可是我現在不能塗，好吧等我拍完戲之後，給大家看看美美的指甲，thx」之後佢仲tag埋個品牌，慌死人家唔知佢有講多謝咁添！之但係......之但係品牌送俾佢嘅明明係唇彩，點解佢話用嚟塗指甲？真係好耐人尋味喎！不過，相隔咗幾個鐘，相信都有人提醒咗周麗淇，佢都即刻喺ig改番寫「Thx beautiful lipgloss」喇！下次小心啲喇！問到Niki點解咁烏龍？佢喺電話大笑表示：「我o依家喺山西拍劇《那年花開月正圓》，助手收到品牌送畀我嘅禮物，佢話係指甲油，之後有朋友同我講唔係指甲油，anyway我唔會怪助手，一個小小美麗誤會，ok嘅，希望品牌唔會怪我」Niki仲讚網友好犀利，即刻cap圖報料：「證明我ig多人follow，多謝！」問到係咪好耐冇搽指甲油？佢話：「因為o依家拍古裝，冇得搽指甲油囉，12月就返香港拍電影《追龍》，同劉德華、甄子丹合作，我飾演子丹哥太太。」
來源 source: http://s.nextmedia.com
|
鍾意就快D Share啦！
|
|
|
