韓君婷97年當選亞姐冠軍，順勢加入娛樂圈，星途算順暢，佢仲由亞視跳糟無綫，幕前工作咗13年，喺第二個「七年之癢」嚟之前，君婷決定暫別娛圈，移居新加坡，協助胞兄打理生意，全面轉營做OL，但君婷近日又回流香港，去咗Merz德國藥廠返新工，佢嘅職位係診所發展培訓執行員，主力宣傳醫學美容同相關儀器。君婷啱啱返咗新工一個多月，慢慢適應同學習中，公司日前就派咗佢去尖沙嘴一間皮膚中心主持醫美講座，君婷同客人分享扮靚心得，全程表現淡定，口齒伶俐嘅佢仲一邊介紹最新美容儀器，一邊幫客人示範。君婷於講座後接受《蘋果》專訪，佢猛話好鍾意呢份工。6年前毅然離港兼跳出娛圈，重過平凡生活，佢唔係厭倦幕前，只係想接受新挑戰：「我鍾意群體生活，以前拍戲，成組人一齊相處好開心，但拍完又分開，要等下次開戲先可識過另一班朋友，又要重新適應。我O依家返文職，日日返office，同事好似我屋企人。」講到做藝人辛酸，佢話：「藝人講際遇，好多外來因素，我唔係嗰種我要做明星，試過拍嘢，做演員時，成日要聽唔同聲音，有真有假，要顧及好多嘢。不過，O依家我對醫學美容有好大興趣，受公司賞識，嗰份滿足感好大。」君婷話曾喺新加坡幫哥哥打理生意4年，嗰段時間令佢融入做平凡OL，幫家人手同打工好唔同，君婷話：「幫哥哥手，朝7晚12呀。」點解咁困身？佢笑言：「幫屋企人打工係必需OT，我同哥哥、媽咪一齊住，有時10點幾，哥哥仲都敲門傾公事，我協助佢打理公司，好清楚所有運作，即使係夜麻麻，唔通唔答咩。一般打工仔，放咗工就可以off line。」過去4年做OL令君婷反樸歸真，佢對幕前冇留戀，係咪已放低藝人包袱，會唔會忽然有戲癮想復出？佢話：「演員成日有戲癮，演員就永遠係演員，到我死嗰日都會寫番出嚟，1997年亞洲小姐冠軍韓君婷，係第二補上嚟嗰個，我阻擋同避唔到呢啲新聞，演員永冇辭職。」君婷覺得做藝人呢13年，為佢留低好多美好回憶，多謝觀眾記得佢：「有啲藝人覺得畀人話過氣好傷心，但聽到有人同我講話細細個就睇我，我唔會嬲，反而開心佢哋對我仲咁深刻印象，證明我當年係做出成績。」君婷暫別幕前，反而更講究儀容，佢話：「我O依家貪靚咗，可能膚質靚咗，有咗信心，以前做演員，我反而好隨便，踢拖、戴黑超就出街。」O依家返朝9晚5，君婷話：「我會朝早6點就起身，沖涼、洗頭、吹頭，打扮完慢慢食個早餐，然後行去搭巴士或地鐵返工。」生活好貼地，佢話：「咁我做平凡工作，梗係要慳啲使，唔需要太奢侈。噚日我搭巴士返工，去到走咗一班車，要企巴士站等多20分鐘，見到街坊都有打招呼，唔怕人眼望望，我又冇做壞事，我係正常返工放工。」君婷對新工投入又有熱誠，佢承認：「轉工係可以令一個人有重生感覺，面對新嘗試，我要學好多嘢，好exciting。」君婷覺得做OL可以分享嘅事竟比做藝人時多：「以前我4個月拍一套劇，一年頂多拍兩套劇、一套電影、兩個廣告，見記者只係得咁多嘢講。」O依家新工令君婷接觸新事物、新科技，又可同大家分享扮靚貼士，真係講極都講唔完。君婷幫公司sell儀器同產品，當然有做「白老鼠」，佢話咁多年從冇做過微調：「五官純天然。」
| 攝影：林德雄 | | |
| | | |
|
鍾意就快D Share啦！
|
|
|