成長地急速發展 唐紫睿嘆面目荃非：冇變嘅係親切感
女星唐紫睿（Hazel）小時候於荃灣居住，堪稱半個地膽。荃灣近年發展迅速，急劇變化，重遊昔日成長地的Hazel，對荃灣感到既熟悉又陌生。今次Hazel重遊當年經常去的冰室、所讀的小學及人生看第一齣電影的戲院，重拾不少開心回憶。
Hazel重回成長地，對於荃灣的一切既熟悉又陌生。她說：「我一出世就住荃灣，雖然小五、小六嗰陣，屋企搬咗去青衣，但我依然經常返嚟荃灣食嘢、買嘢。我對荃灣有好深感受，雖然荃灣變咗好多，甚至連我細個住嗰度都拆埋，變晒大型商場，但再返嚟荃灣，令我諗番起好多細個嘅回憶。好似細個成日幫襯嘅冰室，細個睇呢世人第一套戲嘅戲院，仲有細個一得閒就流連嘅商販攤檔，其實荃灣都有嘢係冇變嘅，就係嗰份親切感。」
【對冰室伙記「日久生情」】
Hazel第一站帶大家去祭「五臟廟」，她說：「喺荃灣新村街有間好出名嘅舊式冰室，連唔係荃灣居民都會聽過。我細個嗰陣，媽咪成日帶我嚟醫肚，呢度嘅雞翼、紅豆冰係我至愛，呢度經常要排長龍等位，但等係值得嘅。唔怕大家笑我，我細個落完單就會望實水吧同廚房，個心猛諗：『得未呀？快啲啦，好肚餓！』日子有功，我將啲伙記個樣印咗落個腦度，真係到依家都仲記得。雖然佢哋已經冇喺呢度做，但即使喺街度遇到，我都可以一眼認出。（啲伙記好靚仔，日久生情？）咁又冇，嗰時我好細個咋，嗰啲都係叔叔伯伯，可能肚餓嘅感覺加深咗記憶。」
【戲院結業 冇晒烤魷魚】
另一個埋藏了Hazel深刻記憶的地方，是她流連得最多的地方：「我細個就係喺呢間天佑小學讀書，嗰時我成日去學校附近嘅報紙檔，過一條馬路就係龍華戲院舊址，呢生人第一套戲就係喺呢度睇，我仲清楚記得嗰套戲就係周潤發《阿郎的故事》。戲院後來結業，但原址一直冇拆，我每次經過都會望多兩眼，緬懷一下。後來戲院位置有部分改咗做酒吧，我以前都有同男友返過嚟飲嘢，但感覺好唔同，因為喺我腦入面嘅龍華戲院就係舊式戲院嘅烤魷魚檔，嗰部好傳統嘅量高磅重機，呢啲依家想搵番都難，全部成為回憶。」
【行小販市場 Enjoy出汗】
之後Hazel帶大家到川龍街，回憶一下她的荃灣歲月。她說：「川龍街有間好老字號嘅鞋店，我細個第一對返學皮鞋就係喺呢度買，到後來大啲買啲名牌皮鞋都係喺呢度。我記得嗰時屋企唔算富裕，我仲要係大家姐，對落有兩個妹，但爸爸媽媽都好錫我，盡量滿足我要求，童年都過得幾開心。呢條街嘅另一面就有好多海味舖，以前逢過時過節都會跟阿媽嚟辦年貨，都係買到熟晒嘅老街坊。其實阿媽係傳統客家女人，做嘢勤力，鍾意親力親為，所以我細個唔使點幫手買餸、煮飯、做家務，辦年貨就係同媽咪shopping嘅難得機會。」
女人不管幾歲都不會討厭shopping，Hazel也不例外。她說：「細個我鍾意去川龍街一個小販市場，嗰時個頂係用帆布罩住，行一陣就焗到出晒汗，但我依然咁鍾意行。其實嗰度都係賣啲底衫、返學冷衫咁，但我就係鍾意耐唔耐就去行。依家呢度改裝咗，改咗名，加裝咗風扇，行起嚟舒服咗，但價錢同我細個好大分別，或者就係荃灣變得愈來愈繁華嘅附帶轉變。」
後記：【繁華背後 失人情味】
Hazel雖然月前已搬往大圍居住，但對荃灣依然情有獨鍾。她說：「冇返嚟荃灣一段時間，呢度都變咗好多，多咗好多大型商場，多咗繁華嘅一面，但少咗昔日嗰種人情味。（會搬返荃灣住？）可能我都會同爹哋媽咪傾吓，因為佢哋依然係好熟荃灣，或者喺荃灣住會更加適合佢哋。」
文：影視組
攝：劉智源
|
鍾意就快D Share啦！
|
|
|