「超級丹」果然勁！
近日劉鑾雄宣布同舊愛呂麗君劃清界線，仲要全方位去揭呂麗君收過自己幾多錢、份人點點點，話晒都係一對仔女嘅媽咪，所謂家和萬事興，下一句係乜？唔使講話口未完，羽毛球壇界一哥林丹偷食斷正，不足廿四小時認衰道歉，最重要係畀老婆一個交代！錯就要認，打要企定，唔會搵藉口左賴右賴，甚至賴落老婆度，總之錯就係自己錯，畀你贏咗場交又點？咪輸咗個家！呢啲咪係有膊頭嘅男人囉！
林丹有句名句：「人生不能沒有底線。」呢鋪簡直係自打嘴巴！林丹喺賽場上點堅守防線都好，美色當前，34C豐乳飄搖，最後都係失守崩潰。贏咗下半身，同時分分鐘輸埋下半生，有傳聞因為呢單花邊新聞要提早退役！林丹日前都照樣返國家體育總局訓練局，進行腿部肌肉訓練。嗱！點解單消息有圖有真相，仲要講明係進行「腿部」訓練？證明林丹終於反省認清下半身嘅重要性，用嚟偷食即係事業家庭total loss車毀人亡，用番喺打波同生兒育女，咁先至係波！
老婆器量無敵
不過我真係好佩服林丹老婆謝杏芳，本住家醜不外傳，從來冇公開數落林丹半句！坊間爆料林丹天賦異稟夠「大」，但係大極都唔夠謝杏芳嘅器量咁大，謝杏芳話全家都會支持林丹呢個知錯會改、敢於擔當嘅男人。至於處於下風嘅「小三」趙雅淇，為收復失地都一於玩大方，話祝福林丹一家。享完齊人之福，都唔會有手尾跟，大婆小三都冇話出嚟狂數互質，和和氣氣， 簡直係男人嘅偶像， 叫「超級丹」，真係冇錯架！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
來源 source: http://hk.on.cc
|
鍾意就快D Share啦！
|
|
|