【東方日報專訊】現年51歲的「美魔女」羅霖在娛樂圈愈戰愈勇，早前她透露已簽經理人公司，前晚羅霖現身晚宴時公布，正式成為王祖藍自資製作公司旗下的藝人，為期兩年，由祖藍舅父為兩人牽線，望在演藝事業上再創高峰。
羅霖自從去年推出寫真集後，工作不斷，前晚她身穿tube dress出席愛基金慈善晚宴，同場還有玩具大王蔡志明太太蔡李惠莉與新抱汪圓圓及女兒蔡加敏、娛樂公司老闆娘諸葛紫岐與丈夫薛嘉麟、藝人朱慧敏、張文慈、歌手關心妍與老公楊長智、王祖藍與太太李亞男、美容界教母鄭明明等，名媛方劉小梅即場表演鋼琴，場面熱鬧。
「小鮮肉」騰騰震
羅霖自爆已簽了兩年賣身契給王祖藍的公司，開心地說：「我對祖藍間公司好有信心，而且佢畀好大自由度我，又唔需要簽好長時間，簽咗兩年，喺香港同內地會有多啲工作。（點解簽畀祖藍？）因為祖藍嘅舅父以前喺亞視做副總裁，我同佢舅父好熟，佢舅父叫我簽。我自從冇做電視台已經冇簽經理人，係出寫真嗰時簽過半年，因為我自己有生意，怕兼顧唔到。當然依家簽咗經理人公司，我會放多啲時間喺演藝事業上，經理人公司放第一位！」出席晚宴前，羅霖剛為護髮產品拍廣告，笑言品牌安排了年僅23歲的小鮮肉做拍檔：「佢同我個仔差唔多大，好在睇落年紀唔係差太遠，似姊弟戀，我哋有啲親密動作，佢冇乜經驗，我惟有主動啲，我感覺到佢震緊，叫佢唔使驚，當我係阿媽或者家姐都得。」
諸葛圓圓計劃出遊
朱慧敏表示為是次慈善晚宴推掉洽談中的內地工作，她早前到了安徽探訪視障兒童學校，又到老人院探訪長者，更在他們面前表演粵曲：「以前細個由婆婆湊我，我都有跟佢去睇大戲，我有諗過學粵劇，想做花旦，但我生得太高，啲人覺得我做小生反串會好啲。」而諸葛紫岐與汪圓圓不約而同計劃聖誕節帶同小朋友外遊，諸葛表示在地點選擇上與老公有分歧：「我想去夏威夷，佢想去澳洲，問番囝囝想去邊。（囝囝會支持你？）多數會，佢知道媽咪比較識歎！」汪圓圓指孖仔尚年幼，會去近一點的地方。
文：名人組
是日精選
|
鍾意就快D Share啦！
|
|
|
