娛圈生活從來五光十色，但到處都係明爭暗鬥。自從黎姿同商人馬廷強結婚之後，自此放棄燈紅酒綠嘅娛圈生活，之後仲為對方誕下三千金，o依家除咗幫細佬黎嬰打理皮膚護理中心外，就主力相夫教女，前塵嘅光輝盡化一縷青煙。樣貌標緻嘅黎姿，喺佢淡出呢個名利圈前，除咗有唔少緋聞，亦不時惹上是非，好似喺97年，黎姿同張智霖拍攝電影《豪情蓋天》嘅時候，佢就同當時仲同ChiLam拍拖嘅袁詠儀(靚靚)展開罵戰。有指當時Chilam同黎姿要拍攝一場床戲，有周刊就報道話靚靚親身去到片場監場，但當時仲未做張太嘅靚靚到電台接受訪問時，就當眾發誓話自己冇去監場，仲話黎姿博宣傳。咁Chilam都幫女友講好話，話佢當日只係喺拍攝現場嘅樓下玩電腦，絕對冇監場喎！咁黎姿當然不甘示弱啦，佢接受電台訪問嘅時候就話：「我根本唔使宣傳，乜有咁嘅需要咩？」對於靚靚嘅指摘，黎姿仲話：「我真係好想叫佢用腦諗清楚，究竟知唔知道自己講緊乜，o依家邊個喺度博宣傳都唔知！」除咗叫靚靚用腦諗清楚，黎姿仲話靚靚譁眾取寵㖭！仲有唔知大家仲記唔記得04年《萬千星輝頒獎典禮》，《金枝慾孽》四主角佘詩曼、張可頤、鄧萃雯同黎姿一齊爭視后，原本呢個獎係飾演如妃嘅鄧萃雯嘅囊中之物，連英國網上博彩公司以一賠四嘅盤口列如妃為大熱門，點知最後爆冷門，由黎姿飾演嘅「玉瑩小主」搶走，令網民鼓譟，仲盛傳話黎姿當年因為簽無綫做經理人而贏獎，搞到佢都覺得好委屈。
|
鍾意就快D Share啦！
|
|
|