曾經被視為陳志雲頭號愛將嘅崔建邦，當日因為志雲捲入涉貪事件被無綫停職後，一度為保飯碗而離棄，再加上涉打前女友鄺敏慧及醉駕搞到形象插水，之後有傳喺志雲回歸無綫後，不計前嫌幫佢搵到份PA，俾佢由低做起，好彩最後佢可以復出幕前。今日有周刊報道話，人生經歷大喜大跌嘅崔建邦，喺訪問上直言呢段間感受到好多人情冷暖，以前賺大錢嘅時候，生活過得好揮霍，見到鍾意嘅嘢，諗唔到諗就會買落嚟，直到做咗PA，每個月$11,000人工，開工食飯盒，收工就返屋企，但就算冇乜娛樂，經濟好快陷入谷底，試過日日計住自己剩返幾多錢，最窮嘅時候，連八達通嗰50蚊按金，都要拎番出嚟用，真係感到窮嘅滋味。阿邦仲話本來一直同媽咪喺清水灣住村屋，但係因為有一次媽咪俾狗咬，所以佢決定要搬走，但係資金唔多，最後媽咪搬咗去天水圍住，阿邦就住喺旺角嘅小型酒店。及後阿邦寫咗封悔過書俾媽咪，佢話好多問題都係由自己引起，佢唔單止自己照顧唔到，連家用都負擔唔到，所以佢要同媽咪講對唔住，仲承諾一定會接佢返屋企一齊住。佢又話呢段時間得到好多朋友支持，好似化妝間啲同事，鄭秀文亦都成日鼓勵佢，阿邦話仲有一個古姓藝人，但係佢唔想開名住，希望到事業有成先公開。至於同林珊珊個女野人拍拖，阿邦話0依家了解中，雖然有成家立室嘅打算，不過覺得好多嘢都未係時候，等經濟有能力先可組織家庭。
來源 source: http://s.nextmedia.com
|
鍾意就快D Share啦！
|
|
|