娛樂偵訊
毛舜筠冇癮拒添食 《八時入席》十個月玩完
大台處境劇《八時入席》超「短命」，今年四月才開播，明年一月尾便玩完。皆因幕後 hea做劇本差，向來對工作有要求的毛舜筠沒發揮之餘，竟被指多事。有人更玩針對，令她主角變配角。冇癮心死，毛姐拒再添食。冇咗主角，劇集十個月玩完！
幕後 hea做唔配合
之前新《愛．回家》收視插水，為挽回頹勢，大台搵毛舜筠回巢擔正《八時入席》。毛姐碌盡人情咭，搵黎耀祥和陳國邦拍住上，連影帝秋生都俾面客串，可惜幕後 hea做唔配合，令毛姐非常受氣。
「當初 TVB應承毛姐好多嘢，話會做好製作，拍番套好嘅處境劇省招牌，所以佢先至出番嚟拍，仲親自游說阿邦同祥仔接套劇。不過開拍之後係兩回事，毛姐睇到劇本就滴汗，佢提議執靚啲個劇本，初時大家有敷衍吓，慢慢就冇乜理佢。可能嫌佢多事，佢啲戲仲愈來愈閒散，冇乜發揮，明眼人知乜嘢事，連網民都話佢個角色似配角。」知情人說。
處境劇向來長拍長有，相當長壽，而且《八時入席》收視有起色，上週三線劇集的平均收視以《八時》最高，平均有二十三點六，比黃金時段的《幕後玩家》平均得二十三點更強。雖然有佳績，但毛舜筠十分冇癮，堅拒續約添食，已正式向曾勵珍請辭。冇咗主角，《八時》惟有叫停，劇組十二月收機，一月尾便正式停播。
《一屋》班底頂上
「 TVB冇諗過毛姐會咁堅決，所以佢唔拍令大家都好頭痕。珍姐見《一屋老友記》反應好，惟有臨時臨急搵部分《一屋》班底，包括呂慧儀同張彥博，加上豹哥單立文，打造新處境劇頂上。不過《八時》搞咗咁耐先有起色，而家又突然叫停，都幾可惜。」知情人說。
理應長壽
大台的處境劇向來長播長有，由八十年代經典的《香港八一》至《香港八六》系列，九十年代播足五年的《真情》，二千年的《皆大歡喜》，全部都非常「長壽」。近年幾套處境劇亦反應不錯，所以《八時入席》咁短命都算異數。
劇集/播影日期/集數
《同事三分親》/07年 3月至 08年 8月/364
《畢打自己人》/08年 10月至 10年 2月/337
《愛．回家》/12年 5月至 15年 7月/804
撰文、攝影、攝錄：娛樂組
|
鍾意就快D Share啦！
|
|
|