娛頭
趁昏迷逼立遺囑 搶孫女信託基金 曹母揚言跳樓 要曹央雲交 2000萬 cash
七億隱形富婆曹央雲，被斷絕來往七年的曹母連日發炮以「唔養佢」、「嫌佢窮」、「住公屋」等作武器狂轟後，扮可憐的曹母露出真面目，以「一次過俾五百萬」或「每月二萬」作最後通牒叫曹央雲二揀一。
週一（十一月二十八日），擔心兩女人身安全的曹央雲忍無可忍發聲明，將多年來買樓給母親、供同母異父細佬到外國讀書，以及經濟上照顧細妹一家的事實盡情剖白。
據了解，令曹央雲心死跟曹母斬纜，是因為 09年她出事昏迷入院，家人到醫院逼立遺囑以及要瓜分她兩個女的信託基金，見未能得逞，曹母又揚言跳樓要曹央雲給她 2000萬 cash，否則公開指控她逼死阿媽。
殺入 ICU分身家
父母早年離異，曹母改嫁後生下一對弟妹，為報復第一任丈夫，曹央雲自小被她視為眼中釘，雖然成長階段受盡委屈，不過出來工作後，曹央雲對家人仍照顧有加。○九年跟上巿公司主席何永安分開，當時剛誕下細女 Promise三個月的她情緒崩潰，昏迷送入 ICU（深切治療房）三日。家人急不及待在醫院逼她立遺囑，令她心死想跟家人劃清界線。
「央雲當時仲係迷迷糊糊，屋企人已經殺到醫院，扯住佢寫遺囑分身家，突然家變，最需要屋企人支持，但佢哋只係諗計攞佢啲錢。佢最心痛係昏迷時，冇一個屋企人照顧過佢兩個女。」知情者說。
半夜前親自交錢
要求分身家失敗，曹母又想出新招。
「佢阿媽好離譜，要央雲喺半夜十二點前，親身拎二千萬現金去寶琳娘家，如果唔係佢就喺三十幾樓跳落去，等全世界知道，佢個女幾咁刻薄同埋點樣逼死自己。其實當時央雲每個月俾五萬蚊家用，過時過節，又會俾多十幾廿萬佢阿媽，就算細妹一家五口，佢每月都俾四萬蚊，又成日請全家去旅行。佢阿媽呢幾日話要求兩萬蚊一個月，央雲唔係負擔唔到，而係知道佢條貪根唔會斷，之後又會有第二啲招數，佢所作所為只想摧毁三母女，令佢哋難堪，喺朋友面前出醜。」知情者說。
集中向孫女打主意
知道兩個孫女是曹央雲命根，跟何生分開後，沒有保鏢貼身保護，曹母轉移火力向兩個孫女打主意。
「因為家變，孫女信託基金有變動，央雲當時搵阿媽幫手，佢又即刻食住上，話明要分一半，央雲唔應承，佢就話要去接大孫女放學，然後同校長爆大鑊，又話搵人斬佢哋三母女，同淋佢哋鏹水。有大半年時間央雲好驚，半夜打電話同朋友哭訴，好多朋友都聽過啲嚇人留言，連律師都勸過佢去報警備案。不過央雲覺得始終係一家人，心軟無咁做。」知情者說。
有福同享住大屋
多年來生活在惶恐中，對曹母百般忍讓，外人認為愚孝，但原來曹央雲最希望能保存一個完整的家。○六年她入住山頂大宅，明知屋企人對她別有用心，仍預留地方給曹母及細妹一家居住。但曹母小動作又再變本加厲，曹央雲不得不跟他們分開居住。
「佢阿媽經常問央雲攞錢，有次更想挑撥佢同大女感情，其實 Audrey當時只得三歲幾，佢喺孫女面前數阿媽，又突然抱起佢係咁大力 chok，央雲見到好驚，之後同個女反鎖喺間房成個禮拜。佢阿媽攞錢方法好得人驚，特登打聽央雲朋友圈子，試過去佢朋友開嘅酒樓見工做洗碗，話明如果唔想佢咁做，就俾一百萬，央雲嗰次就開咗張支票俾佢。咁多年嚟，佢都攞咗接近一千萬現金。」知情者說。
被曹母趕出家門
六歲開始，因父母要外出工作，曹央雲負責煮飯照顧一對細佬妹，中五暑假，她將暑期工資兩成買文具，結果被收了她八成工資的曹母發現趕出家門，她更因而發奮搵錢養家，將屋企人生活質素提升。多年來付出，足夠曹母安享晚年。
「屋企人需索無窮，佢真係無辦法再應付，所以將全副心機放喺兩個女身上，阿媽要搞兩個孫，為保護佢哋，佢當年惟有斬纜完全斷絕來往。佢知呢個係計時炸彈，今次阿媽搞場大龍鳳，佢反而覺得係解脫。佢成日話，只想同兩個女安安靜靜過日子。」知情者說。
週一黄昏，曹央雲出現中央圖書館，對於曹母以往種種索錢招數，她未有否認，一味回應「多謝關心」，之後便急急腳上車走人。
狼過大耳窿
講金唔講心的曹母，據知她常向曹央雲講呢句：「我生得你出，你所有嘢都係我嘅。」難怪曹母多年來挖空心思吸水，招數層出不窮。
生日蛋糕索十萬
跟母親斷交前，曹央雲生日都會變成「索償日」。有傳曹母趁女兒生日時機送蛋糕表「心意」，借機要求曹央雲贈 10萬，當回報養育之恩。幾嚿水的蛋糕就要求幾千倍回報，曹母蛋糕好惡啃。
換條尿片值五皮
曹母自爆不滿坐緊月的曹央雲，花六百元日薪請陪月，幫手湊孫的她得 5千。但據悉當時她顧用兩個陪月，一個護士，以及有管家等一班人幫手，曹母仍爭住幫孫女換咗一塊尿片，事後便要求曹央雲俾 5萬元湊孫費，好狼。
擸走百隻乾鮑
曹央雲曾接母親及同母異父的妹妹一家，同住山頂大宅。當時曹母因向何生索錢不果，便常在廳中哭鬧，嚇得何生不敢返家成個月，一家飽受困擾。最後出動親戚幫口勸曹母撤離。不過曹母離開後，家中一百隻日本窩麻乾鮑（價值數十萬）同時不翼而飛。
曹母袋二千萬照住公屋
住公屋呻窮的曹母，早在 96年已是隱藏的公屋富戶，獲曹央雲連贈兩層物業，但有私樓唔住，繼續扮窮霸公屋。加上曹央雲歷年給她近千萬現金，以及其他饋贈，坐擁約二千萬資產。
96年買入 99年放
曹央雲當時一炮過全付 488萬買入藍田匯景花園，與母親共同持有。三年後賣出時雖蝕了 110萬，但有傳曹母真金白銀分了 200多萬。
97年買入 14年放
之後曹央雲再次一炮過以 320萬購入將軍澳慧安園，給曹母個人名義持有，揸到 14年升至 435萬放售套現，全數落曹母袋。
04年買入公屋
據知曹母買入的寶琳邨公屋，又是出於曹央雲荷包。有指曹央雲當時應要求拿出 48萬買公屋，點知近日曹母自爆公屋只用 24萬買下，鬼拍後尾枕，有人當年報大數！
送二千萬物業給妹妹
曹央雲聲明中，揭露連同母異父的弟妹都養埋，妹妹三個孩子由她供書教學，妹夫在金融風暴損手亦是她出錢搞掂。原來除咗阿媽，細妹呂宛霖持有三間屋都係曹央雲科水。 97年她與妹妹共同持有 1,400萬的西半山高雲臺，至 10年以 1,080萬蝕讓。有能力一炮過買樓的她，在 00年全付 436萬購入沙田觀瀾雅軒給妹妹，到 07年賣出套現，曹妹呂宛霖獲利 100萬。 09年她與家人斷交前，以按揭方式買入 390萬的八鄉一幢村屋贈妹，現升值至 700多萬。
致富之路
奪得 92年亞姐季軍的曹央雲，由一個住公屋，月薪$8600的亞姐，搖身一變成傳奇富婆。其實曹央雲除節儉腳踏實地，懂得廣結人脈網絡，也是致富原因。
出道後雖被亞視力捧，但她選擇是提早解約放棄幕前，轉到金融公司返工，有高人教路投資賺到第一桶金。
之後買磚頭保值，由最起初細價樓東港城、匯景花園，到轉手套現錢滾錢下，趁當時樓市只俾一成首期的好時機，曹央雲以五千多萬買下半山士多啤梨山獨立屋，揸到至今已升值兩億。早年她為兩個女兒在加列山買地建獨立屋， 11年以四億幾沽出，加埋現持有市值一億的禮頓山豪宅，曹央雲成七億物業富婆。
撰文、攝影、攝錄：娛樂組
|
鍾意就快D Share啦！
|
|
|