做過兒童節目主持，近年主力拍劇嘅(麥包)麥長青，喺無綫無間斷咁服務咗29年，本來一直相安無事，點知喺上個月突然傳出話麥包同無綫喺合約達唔成共識，隨時離巢結束29年賓主關係，近日佢已經正式離巢。今日《蘋果》向麥包求證，佢承認同無綫轉咗另外一個形式合作，並唔係傳聞中嘅唔開心，麥包話：「我好開心喎，呢個係我自己嘅要求，原本係想離開出去發展，我想有自由度做自己嘢，樂小姐(樂易玲)一直都有搵我傾，不過只係大家都誤解晒所有嘢，結果我哋認真溝通過之後，公司好體諒同支持，今次真係好開心。」話晒離開一間工作咗29年嘅公司出去發展，點都有啲掙扎，但係麥包話：「冇，今次冇呢樣嘢，可能因為今年啲氣氛令到自己有少少唔舒服，可能係一個變化緊嘅時代，自己未必適應到呢個變化，以前我從來都冇呢個危機感，一直都覺得係天生天養，只要你肯做，又唔係做唔到嘢，一定會有人俾嘢你做，但係今年好似係等人俾嘢你做，我要搵食，始終我有頭家要養，呢樣真係覺得好危險，搞到我有一刻懷疑係咪自己做唔到嘢？我真係唔知。」咁啱喺年初有傳因為高層角力，搞到麥包成為犧牲品，擔正做男主角夢碎，(新聞連結：http://bit.ly/2gRrYPD)，唔知呢件事對佢有冇影響？佢好坦白話：「我諗有少少，但係呢個唔關人哋事，係我自己嘅問題，因為之後都冇嘢做，我自己懷疑係咪自己唔得，我唔係好鍾意去乞求、等人施捨，或者要人哋可憐俾啲工作，可能我細個經歷寄人籬下，所以由細到大都好唔鍾意呢個感覺，唔想屋企人同自己再有呢啲經歷，我一直同自己講，要靠雙手去努力做嘢，令屋企人同自己有番個尊嚴，唔需要人施捨，亦唔想睇人面色做人，所以今年我好唔舒服同唔開心。」直到之後拍《街市遊樂團》，令到佢解開呢個困擾，麥包話：「余詠珊有同我講過，佢話同我合作之後，佢覺得我係可以做自己嘢，之前有傳佢唔鍾意我，但係佢又搵我做嘢，於是我直接問佢，我係咪得罪咗佢？點知佢話冇，仲話如果你得罪我會話俾你聽，但係你從來都冇。」佢仲話：「以前我唔敢問，我唔識任何一個高層，我只係識做事，但係唔識做人，我諗其實要同啲高層、行政人員多啲溝通，少啲誤會，今次中間係有好多誤會、一啲自我審查、一啲無中生有嘅事，反而今次大家傾落係好爽，原來有溝通，成件事係好舒服。」
|
鍾意就快D Share啦！
|
|
|