已故慈善伶王新馬師曾（鄧永祥）嘅長子鄧兆尊，下個月就50歲，但依然有心有力，除有大婆Carmen、二奶車厘子(Cherry)，同祥嫂洪金梅踢爆有揼骨妹三奶之外，今日再被周刊爆出，又有疑似新歡登場。據報道指，疑似新歡操半鹹淡廣東話，身材玲瓏浮凸兼外型高䠷，姿色不俗。當日兆尊一拖三，與二奶車厘子、三奶揼骨妹同「高䠷國產女」到銅鑼灣時代廣場行街，三女一齊圍埋睇香水，三奶見兆尊個樣有少少悶，即拎住其中一種味道畀兆尊聞下，真係好善解人意。之後「高䠷國產女」揀到心頭好，兆尊二話不說就去咗畀錢，跟住上去咗附近一間韓國餐廳食晚飯，坐埋一枱雖然唔多傾偈，但總算相處融洽，兆尊確實有計，勁！《蘋果》今日致電兆尊，佢都大方承認自己有三個女朋友，但疑似四奶就肯定唔係，佢苦笑話﹕「唔係呀，係某茶餐廳老闆娘，熟咪一齊食飯囉。(點解送香水？)同朋友食飯唔可以送嘢畀朋友嘅咩？！唔好見親我同女性朋友一齊，就個個都話係我女朋友啦，我依家只得三個女朋友啫，就係嗰三個喇，已經夠煩㗎喇，冇諗住再有第四個。」兆尊更透露「揼骨妹」英文名叫Claire，佢好維護女友咁話﹕「其實都尊重下人，佢叫Claire啦。」三個女朋友都C字頭，乜咁啱嘅？兆尊笑笑口話﹕「我本命忌C，佢話：『I'don't care(Claire)喎。」嘩，難怪外傳三奶Claire最得寵，連改英文名都有暗喻，咁兆尊又有冇諗過結婚生BB呢？佢好認真咁答﹕「唔好玩啦，我依家咁嘅局面，點結婚生仔呀？！」
|
鍾意就快D Share啦！
|
|
|