鄭欣宜喺叱咤攞咗3個獎，同容祖兒平起平坐齊齊做大贏家，兩位大贏家喺慶功宴上擁抱，面貼面嘟晒嘴扮錫錫，欣宜接受訪問心情仍未平復：「件事真係好癲！」對於祖兒話佢來勢洶洶，欣宜指住自己心口：「佢都來勢（細）洶洶（胸）。」記者笑佢：「嘩！你睇小人哋！」欣宜即兜：「唔係，講笑咋，自己真係冇諗過囉，成件事都癲晒。」講到台上重提死亡之吻（新聞連結： http://bit.ly/2iXxrVZ ），係咪有感而發？欣宜笑住話：「我真係一路好小器記住呢件事，自己最介意，因為被外界批評之後，影響對媽咪嘅感覺。記得當年喺叱咤攞新人獎，台上冇多謝媽咪，因為好驚自己講咗啲嘢之後，啲人又提番起媽咪嘅嘢，其實媽咪係我人生中最重要嘅人，冇理由唔提佢，所以今日戴番佢副眼鏡出嚟，想話畀大家知孝順唔係錯嘅，因為冇佢就冇我，佢副眼鏡我保存到家，其實係平光鏡，但自己戴住發覺眼睫毛掃到塊鏡，所以剝咗鏡片出嚟，自己一定會攞3個獎返去畀媽咪睇。」（新聞連結： http://bit.ly/2iXqy6Z ）問到以前點解冇人同佢慶祝？欣宜話：「因為嗰個階段自己收埋自己，成日同媽咪講要爭氣，但出去玩又點爭氣呢？所以冇乜朋友，但呢幾年賺到最多嘅係大班兄弟姐妹，包括Supper Moment、YY（黃偉文），有乜嘢佢哋即刻出嚟幫我手。」至於攞到我最喜愛的歌曲，但嚴重超時冇得唱歌，欣宜話：「我都唔知，自己都喊到亂晒，總之o依家都好緊張，冇諗過上台攞咁有份量嘅獎。」驚唔驚出年有壓力？佢話：「唔可以驚，呢行只有盡量做到更好，未發生都驚，不如唔好入行啦，許廷鏗、鄧小巧攞獎，我喺台下都喊到攰晒。」問到爸爸鄭少秋有冇send message畀佢？欣宜話：「有呀，爹哋好搞笑，今朝send message問我有冇興趣食個飯？我話今晚係叱咤頒獎禮，爹哋問邊度有得睇？當我攞完第一個獎返後台，收到爹哋嘅message恭喜，我會同爹哋食飯慶祝吓。」
| （攝影：陳俊強、仇志德） | | |
| | | |
|
鍾意就快D Share啦！
|
|
|