鄭欣宜在叱咤頒獎禮上憑《女神》分別奪得「叱咤十大第三位」，「叱咤樂壇我最喜愛的女歌手」及「叱咤樂壇我最喜愛的歌曲大獎」共三個獎，戴住亡母沈殿霞眼鏡，成績大躍進的她攞獎時感動得哭成淚人，但在慶功宴上就表現得100分雀躍，頻呼攞獎是：「好癲呀呢件事。（容祖兒都係攞3個獎，）好癲呀，（祖兒話你來勢洶洶，）佢都來勢洶洶呀，哈哈哈，好大膽呀，佢自己都咁講，又唔係秘密，哈，（你睇少人哋？）講笑啫，哎吔……。（冇諗過攞3個獎？）冇諗過，傻咗呀，真係癲咗。」
唔敢多謝媽咪
談及欣宜在台上大呻怨屈，重提當年扮公主咀吳卓羲，畀人笑係「死亡之吻」，她笑言是小器之人，又話：「好難唔記得囉。」問她最介意之事，她直言：「最介意自己受到呢啲批評影響我媽咪，因為我記得喺叱咤呢個台，我有得攞新人獎嗰年，我必須多謝媽咪，但因為呢啲comment，令我覺得我如果提到我媽咪係錯囉，佢其實係我人生裏面最重要一個人，我冇理由唔提佢㗎嘛。」她又指是晚戴住亡母的眼鏡上台是想講給自己及媽咪知道：「孝順唔係錯，因為冇佢就唔會有我，一定要多謝佢。」
帶三個獎返加拿大畀亡母睇
欣宜又說從不敢戴亡母這副眼鏡，不過因她的長眼睫毛會頂住平光鏡片，故將眼鏡「走鏡片」。問她可會帶三個獎回加拿大給亡母看，她好快答：「會㗎。」又自爆當年因為答應亡母要爭氣及乖，刻意收埋自己令身邊沒有朋友，但經過幾年後，開心贏到不少友誼，識到一班有義氣的兄弟姊妹，包括齊演出的Supper Moment，藍奕邦，何山及黃偉文等，她說：「我有乜事都會出嚟幫手。」
抹眼淚唔顧儀態
問到哭崩的欣宜用了多了包紙巾？她說：「一張喺袋，兩邊pat（胸墊）左右攝一張，我有抽出嚟用，我不嬲冇乜儀態。」她又說上台無懼色，因為會將驚化為動力，又豪氣話：「未發生驚嚟做乜，驚就唔好入行啦。」
秋官即時恭賀
欣宜提及父親鄭少秋（秋官）時又表現得冧滋滋，指秋官曾邀她食元旦飯，可是她以出席頒獎禮而婉拒，秋官才豁然大悟，問女兒在那裏可收睇頒獎禮，欣宜開心說：「Daddy有睇晒，因為佢係第一個send message畀我嘅。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|