【賀歲驚喜】星爺亂入《西游》扮工作人員拎大聲公講啲乜…
2017-01-28 11:20:00 HKT
《西游·伏妖篇》由一開場文戲去到打戲，3D效果同聲效有唔少人睇完都覺得整得唔錯，冇頭暈感覺，同埋畫面間場都好漫畫式，好似打鬥同爆破都有啲似漫畫嘅角色，真係比起第一集《降魔篇》有好大進步，尤其係打鬥場面啲刀劍橫飛，效果都幾立體。
套戲片長逾一粒鐘，《西游·伏妖篇》好多場口都用咗CG去畫，好似沙僧，上一集講到佢係一隻魚妖，大部分時間都係變成一條大魚，唔少近鏡及表情都係CG畫得幾細緻，仲要以3D表達，當中仲有其他妖怪都係漫畫化，配合3D，好似蜘蛛精、孫悟空由人樣變做齊天大聖個樣，面部表情都幾靚，睇得尚算舒服。
此外，片尾有一個30秒嘅彩蛋見畫面影住一班人喺戲院入面散場，觀眾當中，就有曾演《美人魚》做警察兼有線主持人阿正(李尚正)講嘢，佢講：「睇完戲喇!仲唔走嘅，等緊彩蛋吖嘛!」有個「工作人員」就話：「多謝各位!出口嗰邊。」其他觀眾就話：「大片一定有彩蛋。」
原來個工作人員抬頭，原來係戴眼鏡嘅星爺周星馳，星爺向觀眾講：「唔係大片，所以冇彩蛋。」之後喺一個垃圾膠袋拎咗個大聲公出嚟，再講多一次：「唔係大片，所以冇彩蛋，如果係大片，點會冇彩蛋!」講完就自己喺度笑!完!
來源 source: http://hkm.appledaily.com
|
鍾意就快D Share啦！
|
|
|
