【東方日報專訊】「處女黨」新成員陳嘉寶和富貴男友黃頌祈（Epaphras）感情發展穩定，但女神竟被撞見跟才子「新歡」林皓霆（Charles）到書局甜蜜互動，貼頭玩自拍又互摸下巴，單純朋友關係成疑。據知正印闊少亦聞暗湧，新年時追女追到廣州，更求婚100次，全力展開守「豬」行動。
現年27歲、模特兒出身的陳嘉寶（Anjaylia）早年在無綫劇《女人俱樂部》中飾演李若彤少女版而人氣急升，再拍《殭》劇時，同樣大獲好評成為女神之一。Anjaylia已有一位拍拖4年的闊少男友Epaphras，由於兩人均是虔誠基督教徒，故拍拖多年保持「有愛無性」關係，堅守教條。
鮮有緋聞的Anjaylia日前卻被發現跟文青feel型男在銅鑼灣一間書局密會，男伴似乎對她相當嗒糖，主動挨埋Anjaylia身實行一本書兩份睇，兩人更伸手互摸下巴及膊頭，當然少不了貼頭自拍的指定動作，學足十幾歲o靚仔、o靚妹的親密互動，打完一大輪「書釘」後，仍意猶未盡到書局樓上飲下午茶，開心對足個幾鐘，原來跟女神約會的正是和她合作出書的模特兒兼Blogger林皓霆（Charles）。
貼合照宣示主權
Anjaylia身邊突有「新兵」埋身，有消息指守「豬」多年的Epaphras力保女友不失，早前得知她在農曆新年期間要返廣州跟80多歲高齡的祖母拜年，和黃家食完團年飯及拜年後，於大年初二即趕頭趕命飛車到廣州給女友驚喜，兼見埋Anjaylia的祖母及姑姐等長輩，實行打「孝順牌」博加分。而Epaphras在廣州陪女友期間，高調於社交網上載跟Anjaylia飲咖啡的搞鬼合照，露出勝利笑容的他似有意宣示主權，暗叫狂蜂浪蝶「死咗條心」，而Anjaylia為獎勵男友貼心，連日來都相陪食「好西」，食杧果糯米卷時加送瞇眼、嘟嘴的誘惑表情，男人看見都為之心動。
昨日Anjaylia接受電話訪問時冧讚男友：「年初二時，佢一個人趕嚟廣州同我阿嫲拜年。（咁孝順攞滿分？）當初都係因為佢孝順，我先同佢拍拖。」問拍拖四年可有結婚打算？她直認男友已求婚過百次：「佢成日攞包朱古力或包糖嚟問我嫁畀佢好唔好？我覺得係講笑囉！（送咗戒指未？）冇呀，我嗰隻戒指係自己買畀自己紀念洗禮嘅，好多人以為訂婚戒指，我冇話特定嘅求婚模式，都係等神嘅安排，或者有一日會突然結婚㗎。」
同房瞓冇事發生
兩人皆是督教徒，問是否要守貞？Anjaylia說：「佢係我第一個男友，同佢都好有呢個堅持。（試過去旅行同房未？）試過，不過我哋好清楚做緊乜，有啲嘢唔發生就唔發生，有啲人就算雷電交加、乾柴烈火都唔會發生嘢，呢個係信念問題。」又謂身邊很多非基督教徒的朋友也很守貞。
問跟Charles的關係？Anjaylia指是相識多年的好友，因自己性格太麻甩，常撩Charles說：「點解你咁靚仔嘅？」搞到Charles以為「神女有心」，她說：「我成日同佢講笑，有晚唱K，Charles突然好凝重咁同我講，佢目前想事業為重，唔想拍拖住，佢以為我暗戀佢，笑到我肚攣。」她指不會因Charles曾請食檸檬而心存芥蒂，昨日她又上載挨住Charles膊頭的合照，繼續留言大讚：「來帥哥平衡一下了。難得的是大家不約而同的都走在帥氣懷舊搖滾風。是緣分嗎？」更tag了Charles，未知Epaphras會否再打爛醋埕呢？
文：音樂組
|
鍾意就快D Share啦！
|
|
|
