男慳家換舊款車 女讚孝順好仔
黃心穎馬國明戀情升溫
派定心丸：有感覺
43歲的圈中筍盤馬國明有樓又有愛心，前日更換了約值84萬元的Benz新車，難怪連細他十五年的黃心穎都被吸引，正在萌芽的馬心戀日漸升溫，前晚心穎BB坦言對馬明有感覺，公開讚他，連缺點都變優點：「悶有悶好！」馬明昨日亦讚心穎BB為人爽朗，不會刁僑扭擰，擺明郎有情妹有意。
【風騷谷胸】
黃心穎前晚在澳門穿上低胸裙性感亮相，她坦言對馬國明有感覺。
馬國明與現年28歲的港姐亞軍黃心穎被連環踢爆蜜會，心穎BB於上月28歲牛一翌日，被本報讀者以「爆相爆片」指她孖馬明拍拖睇戲，半個月後，兩人又被影到去日本餐廳撐枱腳，馬心戀密密見打得火熱。
非一約得米
前晚心穎BB到澳門出席德晉集團春茗，穿上性感大露背裝谷胸現身的她，明顯滿面春風，被問到與馬明有否發展機會？她甜笑說：「可以再了解吓，但都要畀啲空間我哋，你哋咁樣，我哋唔會夠膽做任何嘢。」追問機會大唔大？她直認：「So far都OK嘅。」
問到是否只有馬明一個對象了解中？她大方認：「係啊，我冇咁多精神，感情唔可以分散投資。」覺得馬明有甚麼優點？她讚不絕口說：「孝順好仔，好多人話佢比較悶，但悶有悶好。」開始有感覺了嗎？她甜笑：「OK吖。」不過，日前馬明跟劇組慶祝生日，心穎BB卻缺席，只跟他說了生日快樂，連禮物亦欠奉，她笑說：「佢應該冇嘢缺，我冇理由送女人畀佢，唔會送自己畀佢。」
【冧讚心穎】
馬國明昨日赤腳接受健康檢查，大讚心穎BB性格爽朗，不會刁僑扭擰。
馬明昨日現身尖沙嘴出席神經健康活動，對於心穎BB指了解中的對象只得他一個，他擺出招牌呆樣說：「等我了解吓先，我哋未傾到咁深入。」問到是否同樣只得心穎BB一個了解中？他扮儍說：「我好少約會好多女仔出街。」對於心穎BB讚他孝順好仔，馬明由心裏笑出來：「等我了解吓成件事先啦，不過俾人讚係開心嘅。佢係幾爽嘅女仔，唔會刁僑扭擰。」之前約心穎BB是否一約得米？他坦言：「咁又唔係喎，都要約兩三次㗎。」
講到心穎BB坦言對他有感覺，馬明呆中帶笑：「吓，係咪真㗎？唔好老作喎！」問到日前跟劇集《鐵馬尋橋》演員慶祝生日飯，為甚麼沒心穎BB份？他說：「冇咁快，同佢仲係了解緊。」記者指心穎BB大方認有感覺，為何他身為男人卻這樣？馬明反駁說：「其實都唔知係唔係，我都想知成件事係點。」他更講笑說：「我啲神經有啲受損。」直問是否追心穎BB？他繼續耍太極：「了解中。」
採訪：黃曉妍
攝影：陳俊強、葉君海
心穎BB與馬明早前到太古城拍拖睇戲斷正。資料圖片
|
鍾意就快D Share啦！
|
|
|
