曾經喺娛圈名震一時嘅處女黨，個個係咁輪住嫁，李亞男、鍾嘉欣、岑麗香、王君馨……狀況如黃耀明首歌《十個救火的少年》一樣買少見少，呢個「朵」幾乎要列入史前動物。又係嘅，佢哋全部樣靚身材正，係男人都想快啲私有化喇！日日咁對住件性感尤物，試問點忍？所以鍾嘉欣雙喜臨門完全明晒，人之常情啫！但27歲嘅宅男女神陳嘉寶（Anjaylia）就發出「守貞偉論」，自爆同男友拍拖四年「有愛冇性」，即使出埠旅行全程瞓埋同一張床，那怕遇上雷電交加、乾柴烈火又如何？只要守齋信念強，就可練到「零衝動」，明言仲保住「乳豬全體」喎！唔係啩？呢種講法完全超越人體極限喎！真係要套用靈異事件片尾嗰句例牌：「信不信由你」
男友冇衝動？你信唔信？
Nuts哥自問係凡人，好難想像「聖女」Anjaylia嗰種守貞法，雖然有宗教信仰做後盾，始終咁大個女先第一次戀愛，正所謂「初戀無限Fun」，加上現今乜都講求效率，「性女」充斥Market，Anjaylia得天獨厚一副純純靚樣，身為雄性動物點會冇感覺、冇衝動？相對同樣自稱處女之身嘅「細細粒」陳嘉佳，就合理可信程度高好多。至於Anjaylia講到「理性可以戰勝天性」呢個說法，到底係美麗願望定係真實謊言？Nuts哥斗膽講句有質疑過，從天性角度出發，所謂「食色性也，人之常情」，男人圈更直接抵死「有食唔食，罪大惡極」，就連Anjaylia老死、喺夜店玩過牆壁咚、戀愛經驗相當豐富嘅鄭嘉穎，都唔怕尷尬坐低搵當事人問個明白，就知有幾唔合乎常理。
叫緊十三么等食西
過往亦有不少圈中人希望守貞到新婚，結果露埋餡都唔使畫公仔畫出腸，心知肚明，證明理論與實踐係幾難共存，所以成功戒色嘅虔誠教徒藝人高皓正咁，佢喺網上曾分享過「10個不婚前性行為的理由」：包括「自信心大增」、「對方父母歡喜」、「不會怕有咗」、「更多了解對方」、「很想結婚」、「只會找結婚對象」、「容易處理性沉溺」等，以過來人身份現身說法信仰助他不再沉迷女色。Nuts哥都覺得「高教主」所言有理，只係每每意志薄弱，衰一時衝動下連「豬扒都變貂蟬」照食落肚咋。
講咗咁耐，Anjaylia能夠保到貞，佢男友「想食唔食得」當然居功至偉，為守住自己未來隻豬跟到天腳底，點解唔實際啲度掂求婚計仔拖女友入教堂行禮結婚，咁咪唔使長期守「豬」待兔，亦好似攻打四方城咁，一開牌叫緊十三么等食西，點知畀人自摸西雞胡食咗，到時臨尾香就揼心喇！
|
鍾意就快D Share啦！
|
|
|
