藝人周柏豪以一身運動裝扮出席保險公司活動，他於會上跟客戶高層踩單車鬥快比賽，昨晚剛由英國返港的他因時差關係，所以踩到喘晒氣。他表示在當地逗留了兩星期食了好多西餐，笑言變咗肥仔，所以回港後要努力操練，因為4月就舉行紅館演唱會，他說：「就算唔使騷身形，都要進入狀態做好多運動。」柏豪表示由開始健身到依家，共重了4、5磅，更增加了肌肉，他說：「我要先增磅，因為我本身係瘦削嘅猴子，要變『King Kong』先，之後再修練線條。」
DIY神聖禮物冧老婆
問到柏豪是否特登趕回來與太太Stephanie過婚後第一個情人節？他笑說：「唔係特登，做完嘢永遠都係早啲返嚟好啲，都掛住屋企。（點樣慶祝？）慶祝我返嚟香港？我覺得我返嚟係需要慶祝大啲，因為走咗太耐。（情人節有咩準備？）真係冇乜特別。（唔浪漫？禮物呢？）我返到嚟已經係最好。」柏豪表示兩人都喜歡簡單啲，不過太太會送禮物給他，他說：「我送佢啲禮物神聖啲，我會發揮我嘅才華，寫歌、剪片、影相，呢啲我好鍾意做，獨一無二，我成日喺我老婆面前認叻。（你太太鍾唔鍾意？）實鍾意嘅！」
忙到無暇諗造人計劃
講到叫太太生個B給他，柏豪笑說：「我有份喎！如果係嘅話要多謝佢，但真係未係時候。（打算幾時生？）真係冇乜點plan，做好咗手頭上嘅工作再諗，啲人成日問我Honeymoon未，都未，其實由結婚到依家，都冇乜真正坐低見過，佢做嘢要飛，到佢返嚟又到我飛，呢個月咪尋晚見，平日咪喺網上見，Facetime嗰啲，都掛住屋企、掛住佢、阿媽、阿爸。依家咪明白父母以前要搵食，好耐都見唔到，就係因為工作。但開心嘅，有得工作見識好多嘢。」
開紅館騷前忙拍劇
雖然演唱會將於4月舉行，但柏豪仍要為無綫拍攝劇集《使徒行者2》，而明日就要開工，柏豪說：「其實計埋今次係喺香港第4次開演唱會，我未試過開騷前有成個月可以閉關，次次都夾雜咗啲工作，但都應付到，反而我鍾意咁樣！如果畀長時期我閉關，自己會覺得有好多時間，我個人就會懶懶散散，反而冇乜時間迫我出來，我會認真啲，珍惜練嘢時間。」
|
鍾意就快D Share啦！
|
|
|
