熱爆娛樂: 【獨家】貌似阿嬌人妻空姐冧祖兒？借Joey細佬埋身？ _

2017年2月15日星期三

【獨家】貌似阿嬌人妻空姐冧祖兒？借Joey細佬埋身？ __,阿嬌,容祖兒,祖兒,容袓兒,Joey,鍾欣潼,

天后容祖兒(Joey)出道近18年，早已紅遍中港台，但睇番佢出身，其實係佢嚟自單親家庭，佢父母喺佢15歲時離婚，容媽媽帶大Joey同細佬容逸恆（Samuel），三母子相依為命，故此感情好好，Joey不但供細佬去馬來西亞讀書，又打本畀細佬開汽車零件公司做老闆，仲買埋松柏新邨單位畀細佬住。身為天后細佬嘅Samuel，如今年近30，有樓有車有公司，當然唔少得有個靚女友，不過，有讀者爆料話Samuel最近疑與一名空姐人妻過從甚密。據讀者李小姐報料稱，Samuel嘅空姐密友叫Samantha，貌似鍾欣潼（阿嬌），面尖尖眼大大好靚女，皮膚白淨，身材又好，不過，李小姐就稱對方是人妻，且對Joey一直有好感；又指Samantha為接近Joey，故向Samuel埋手。李小姐提供數張Samuel同Samantha煙韌合照，其中一張相兩人面貼面十足黐頭芒，Samantha嘟嘴扮錫Samuel，sweet到爆；另一張相係Samuel擘大口食雪糕新地，身旁嘅Samantha都張大嘴扮食，似乎真係好熟！另一張Samantha嘅婚紗相，驟眼睇跟阿嬌真係有八成相似。另一張「床照」……主角係一隻白色貴婦狗，佢正喺度覺覺豬，呢張相係Samantha貼喺社交網嘅，但咁啱Samuel都喺facebook貼過同白色貴婦狗嘅合照，究竟呢隻狗狗嘅主人，係邊個呢？另一方面，Samuel嘅facebook冇貼過女友相片，睇嚟佢對自己嘅感情生活好保護。關於細佬被爆疑搭上人妻空姐，Joey透過經理人霍汶希回覆《蘋果》：「細佬大個又成熟，會處理自己嘅嘢。我想保護番屋企人，呢啲都係細佬嘅私隱，我唔會回應。」

	Joey細佬Samuel，近日被爆與有夫之婦過從甚密。(讀者李小姐提供圖片)	Samuel同Samantha頭貼頭食雪糕。(讀者李小姐提供圖片)
Samuel女友叫Samantha，係一名空姐，更係Joey嘅狂熱fans。有指佢埋Samuel身，目的都係為咗偶像。(讀者李小姐提供圖片)	Samantha某啲角度似阿嬌，讀者李小姐更提供其結婚照，證明Samantha已婚。(讀者李小姐提供圖片)	Samantha早前喺社交網貼咗張白色貴婦狗瞓喺床嘅相。(讀者李小姐提供圖片)
Samuel亦喺facebook貼過同白色貴婦狗嘅合照。(讀者李小姐提供圖片)	Samuel得家姐Joey照顧，30未夠已經係有車有樓有公司階層。(資料圖片)	Joey同細佬感情要好，之前就影到兩個人漏夜結伴一齊踩單車。(資料圖片)
Joey同細佬、媽咪自小相依為命。	Joey自小已經好錫細佬，佢話細佬已經大個仔，感情事自己識處理。