格仔餅（六嚿腹肌）是怎樣練成的，睇 Emil輕易做到引體上升便略知一二。
名人專訪
靠大隻冧麥明詩 運動狂熱分子張存華
鐵板神算董慕節的外孫張存華（ Emil Cheung）是運動員經理人，又是樂視籃球評述員，以往只在體育版出沒，直至本月初，同十優港姐麥明詩於淺水灣短敍斷正，被指同林作拗手瓜爭女後， Emil旋即成為娛樂版新貴。
練得格仔餅（六嚿腹肌）跟身，兼手瓜起𦟌，平時又愛下廚煮幾味，冧女必殺技有齊， Emil不諱言所作的一切全為了他的最愛——籃球！反高潮吧！但當事人說起來雙眼發光，大抵這就是外間所指的運動癡！
一股傻勁
Emil愛運動愛到一個點，先是放棄金融策劃的高薪厚職，跑去做一個人工差一大截的體育記者，之後番書仔遇上汕頭大學籃球隊聘請營運總監，即使事前未實地視察過環境，合作協議都未簽，便一股傻勁拎住行李跑上位於揭陽的汕頭大學。每朝七點開會，一星期二十小時訓練，遇上飲食唔啱口味和居住環境惡劣到不能開窗通風的情況下，仍為球隊打點一年半，直到獵頭公司挖角到 Adidas Group才離開。「上到去我覺得係一個好好磨練，體育係我一個夢，我覺得有熱誠我係 live到，我應該幫有需要幫助嘅人。」 Emil雙眼有火地說。
我唔大隻
在樂視兼任 NBA評述的張存華，不介意外間稱呼他「講波佬」，表示只要球迷認同他的專業便足夠。反而對於「大隻仔」的稱號抗拒至極。見 Emil操到手瓜起𦟌，忍不住問：「係咪食大隻奶粉㗎！」對方眉頭一皺說：「我唔係操到好大隻，我目標係打籃球 OK，唔受傷同埋健康囉……我唔會食嗰啲（大隻）奶粉。」
為了夠體力打波兼減低受傷， Emil一星期抽六日分組做高、中、低強度運動各兩組，其中高強度運動，會請教練為自己進行訓練。「我都希望有個叻人去 push我，最少（做）一個半鐘。」 Emil說。工作忙從來都不是 Emil的藉口，即使檔期排到滿，只要有半小時， Emil都會踩上跑步機走轉，當減壓。擁有健身教練牌的他還分享了一個保持靚身形的貼士，表示晚上謝絕碳水化合物，配合少鹽、少糖的飲食習慣，配合帶氧訓練減低脂肪比例，全身的線條便會很明顯。
嗌救命
在 Adidas Group為另一品牌打造一支 team reebok籃球隊後， Emil被挖角到一間專責香港運動員的公關公司做市場經理，積極發掘不同範疇合作的 Emil，今個月初同十優港姐麥明詩會面斷正，外界直至他同林作拗手瓜，原本滔滔不絕的 Emil，一提到 Louisa（麥之洋名）即時嗌救命：「嘩，好驚喎，你咁樣問我，唔知點答喎真係！」
Emil直言不會因為被傳媒撞破，而避見 Louisa，但表明現階段兩人只是朋友，不想對未來作任何猜測，但係都不忘大讚麥明詩叻女又有吸引力，冧到出面。咪睇 Emil有家底，又有齊暖男具備的條件，應該大把女埋身，實質他的感情生活已經有幾年的空窗期， Emil不否認對拍拖中的另一半有一定要求，令對方造成壓力，所以現階段不作他想，只專注工作。「我覺得呢樣嘢好隨緣，尤其姻緣好多時係注定，我媽咪同老闆成日同我講，你做嘢啦，做好啲，真係識人或者被識嘅機會係多啲，咁我希望呢刻都係專注工作。」 Emil說。
張存華簡介
英文名： Emil
年齡： 27歲
感情狀況：單身
背景：鐵板神算「董半仙」董慕節外孫
學歷：美國普渡大學（ Purdue University）畢業，主修金融策劃
事業：
2013-14 nowTV體育主持
2014-15 受聘汕頭大學籃球隊營運總監
2015-16 Reebok市場營銷，以及香港甲二組別晉裕籃球隊主教練
2016至今 Harvest Sky公關顧問及樂視 NBA評述及節目主持
撰文、攝影、攝錄：娛樂組
|
鍾意就快D Share啦！
|
|
|
