最近憑無綫劇集《迷》嘅「入魔」演出再次Hit爆嘅田蕊妮，被外界盛讚「演技再度大爆發」！大讚佢喺個劇度由前段一個普通女人仔，演到後來慢慢成魔，當中嘅轉變令人不寒而慄！仲話阿田嗰種話喊就喊、話癲就癲嘅自由式跳掣演出，睇到觀眾隔住個Mon都覺得驚！感覺自己好似變咗劇中嘅吳業坤咁，啲手指被阿田逐隻逐隻拗開，然後驚到唔敢自己屈番埋，就咁跌咗落街！難怪阿田老公杜汶澤都話，老婆嘅演技可以同擅演癲、狂、喪嘅荷里活影星積尼高遜相比，仲得戚到話：「你估依家TVB冇咗佢又得咩？」阿澤未免太搞Gag喇！計我Nuts哥話呢，阿田冇咗阿澤先係真正嘅踢晒腳、冧晒檔呀！
一朝得志 亂辣火頭
古希臘哲學家蘇格拉底有句名言：「娶到一個好妻子，你可以得到幸福；娶到一個壞妻子，你會成為哲學家！」田蕊妮嘅情況係：「嫁到一個好老公，你可以得到幸福；嫁到一個好似杜汶澤咁嘅老公，你必成視后！」正如阿澤喺佢嘅回憶錄度講過：「俄國戲劇大師史坦尼斯拉夫斯基《演員的自我修養》，並不是我的參考書籍，想要改善演技，當前急務是研究人類行為，分析人類的心理和精神！」連阿澤都自嘲阿田有一個「衝動、多言、怯懦、怕事」嘅杜汶澤做老公，呢十幾年有咩甜酸苦辣未試過？演精神分裂，碎料
由阿田初次見面就認定年輕時爛賭嘅阿澤份人「懶叻、懶巴閉」起，到後來睇住阿澤點樣為同小三雙宿雙棲，而狠撇結婚只有3年嘅前妻；再到阿澤被小三玩弄完，被棄之如敝屣，男人老狗話玩自殺；再到阿澤後來喺亞視一朝得志，當正化妝間係私人休息室，嘈喧巴閉， 仲當眾鬧爆出聲提點佢嘅阿田：「籮又大面又肥樣又衰，戲又唔係做得好，做主持都黐脷筋！」再到後來阿澤溝掂阿田，阿田卻夾在父母的反對之間，再加上咁多年來，阿澤所辣着嘅火頭，得罪過吳君如、黃秋生等圈中人，阿田真係少啲自我修養，都已經同阿澤上演「六國大封相」！
長年特訓 演技神級
不過阿澤讚阿田係「無綫開台以來頭三位好戲嘅女演員」，排名只係喺藍潔瑛同鄭裕玲之後，雖然佢醒目地補飛話汪明荃係超越演技，呢番說話留喺屋企張大床上講係OK嘅，但對記者講就係為阿田辣火頭！事關2013年攞咗視后嘅阿田，2014年輸畀佘詩曼，2015及2016年再連輸兩次畀胡定欣，連續3年與視后無緣，唔通阿佘同定欣係「無綫開台以來第2.8及2.9位好戲嘅女演員」咩？事件充分解釋咗當年阿澤因言論惹來內地網友「禍及妻兒」，喺阿田微博度炸版，留言：「你老公是個傻X」、「你老公那麼蠢，你知道嗎？」，未必全無道理！
男怕入錯行，女怕嫁錯郎，但阿田喺阿澤嘅「特殊訓練」下，練成咗「一身包四味」嘅好修養，無論甜、酸、苦、辣，佢都有貨賣，就係因為平日闖禍無數嘅阿澤對阿田嘅實戰教學有功， 令阿田無論咩喜劇、悲劇、精神分裂角色都應付自如，唔好戲至奇
|
鍾意就快D Share啦！
|
|
|