最怕回南天，因為中醫話費清本身已經濕重，每逢回南天特別容易「春困」，即係易攰無精神，再加上間屋又變得濕立立，成個人周身唔聚財……最近費清覺得有樣除濕物料，都值得推介吓，就係珪藻土。早前聖誕節抽禮物抽中一件珪藻土浴室墊，似一塊薄石板，沖完涼踩上去，腳嘅水超級快被浴室墊吸去，功效快過一般布墊，而且唔會發霉。費清試過刻意倒一個潄口杯咁滿嘅水落去，一兩分鐘都乾曬。呢種物料恐龍時期已出現。珪藻係幾千萬年前地球上單細胞浮游生物，死咗之後遺骸經石化變成「珪藻土」，因為孔洞非常多，一粒納米咁大已經有超過幾10萬個窿，所以可調節濕氣、吸附臭氣。而且，珪藻土仲會「呼吸」，乾燥時會適當排出吸入嘅濕氣。（好似有生命咁，費清每次踩落去都有啲唔好意思……）其實，塊浴室墊仲有個功效，就係放喺衣櫃吸濕，而且咁大塊，吸濕量應該唔錯，又可以吸臭味。日本好多珪藻土產品，部分就係細細塊放喺衣櫃，價錢都唔平，但細塊過浴室墊。日本台灣及香港仲會將珪藻土加喺建築材料，加喺牆身或地板吸濕。保養好簡單，因用得多吸濕能力減低，其實因表面細孔堵塞，所以只要用幼細砂紙輕力擦表面，用乾布抹去粉末，就可以繼續吸濕。坊間有唔同牌子珪藻土，一塊浴室墊約百幾至二百蚊。費清＃要生計，也要生活＃毋忘初衷
來源 source: http://s.nextmedia.com
|
鍾意就快D Share啦！
|
|
|