咁快就收拾好心情重新出發？！
藝人龐景峰與前候選港姐楊埕（Sabrina）在2015年中撻着，去年突然傳女方因被打而分手，不過未幾又告復合。據知上月楊埕生日，男方還為她大搞生日會，但在本月中再因打架而爆分手，兩年情玩完！雖然雙方冇表面傷痕，但楊埕不時跟好友訴苦。據知今次分手有別以往，龐景峰實行要劃清界線，即使分手前已相約共同朋友去遊船河，最終亦臨時甩底避見女方。而楊呈上周曾在社交網大呻：「單身的日子最煎熬就是沒有對的人陪你看電影，楊埕表示寂寞但好忙。」未幾又刪Post。知情人士爆料指龐景峰愛溝女，楊埕身邊也有不少男仔，但否認收兵。
接Job似自殺
龐景峰昨日在電話中亦承認「分」訊，他說：「一段時間，好耐係我去台灣之前幾日分手，大概4月中。」景峰透露將搬到上海居住，因接了一個大Project，但簽了保密協議，暫不能透露，6月尾則要開新戲，8月到台灣拍武打片。問到是否因分隔兩地而提出分手？他說：「唔係，分開吓，不過都仲日日有傾電話。（分咗幾次？）好多次，無數。」他強調未來會集中精神工作：「未試過咁驚，接咗呢個工作，感覺好似『自殺』咁，唔可以分散注意力。」有傳因再爆肢體碰撞而分手，他笑說：「冇，如果有，都係佢打我。我咁大隻，唔夠膽郁人！」至於為求劃清界線而避去聚會，他說：「我之前去咗台灣，點出嚟？」回復單身的景峰，日前也被東網捕獲與一名女友人在銅鑼灣出現，見他一臉愁爆在傾電話，未幾他與女友人道別再與另一男友人碰頭。而楊埕至截稿前未有回覆。
來源 source: http://hk.on.cc
|
鍾意就快D Share啦！
|
|
|
