「第三十六屆香港電影金像獎」已經圓滿結束，《樹大招風》奪5獎成大贏家，囊括最佳電影、最佳導演、最佳男主角、最佳編劇同最佳剪接。（完整得獎名單： http://bit.ly/2phweb8 ）《樹大招風》其中一個導演，就係《十年》中《方言》嘅導演歐文傑，但今年同上年《十年》一樣，《樹大招風》被大陸全線封殺，大陸媒體新浪娛樂、搜狐同騰訊都「自動」刪走最佳電影一欄，至於《樹大》其他相關獎項，媒體只係公佈得獎人名，但戲名欠奉。而同樣喺得獎名單中戲名「被消失」嘅，仲有《點五步》，雖然呢套戲明明喺今個月7號喺大陸上畫，但係佢個名都係「被消失」，同樣係有得獎人名冇戲名。有指《點五步》片尾有雨傘運動嘅場面，未知係咪「被消失」嘅理由。而今年已經係連續第2年，大陸媒體拒提最佳電影賽果。講番現場，《樹大招風》監製游乃海上台致謝辭時話：「多謝金像獎、評審，多謝支持呢部戲嘅朋友，《樹大招風》有咁成績真係喜出望外，當初杜生搞呢部戲得一個目的，就係培養啲新導演，冇諗過票房同市場，所以一定要多謝支持呢部戲拍得成嘅寰亞公司嘅劉總，希望更多老闆支持我哋香港嘅新導演，香港嘅年青人係好勁嘅。」任賢齊：「多謝咁多前輩，香港電影豐富咗我嘅生命，我所有嘅夢想都係電影睇到，我好榮幸可以參予呢部電影，多謝大家支持，我會用心繼續拍好電影。」姜皓文：「多謝大家鍾意《樹大招風》。」林家棟：「希望來年有更多唔同類型，唔年年代嘅電影人，拍更多更靚嘅電影畀大家睇。」黎明上台頒發最佳男主角，全場立即歡呼，最佳男主角由《樹大招風》林家棟奪得，佢先後3次最佳男配角，首次入圍最佳男主角就成功得獎。家棟台上話﹕「冷靜啲，一定要。呢部電影去年好多好聲音、好多風風雨雨，但仍得到寰亞支持，多謝林生。亦要多謝杜琪峯、游乃海，同三位新晉導演，仲有編劇台前幕後、黑仔（姜皓文），同唯一女主角。咁多年入演戲，我覺得係冇分年紀，唔計較顏值，最重要用個心做好每個角色。我好proud of自己係香港演員，咁多年嚟畀咗好多養份我，幾十年社會變化、人嘅變化，令我可以做啲有血有肉，令我可以做啲好人性嘅角色大家睇，希望往後有更多呢啲角色畀大家，同新晉導演出現。仲要多謝珍姐、萬子、華仔，我覺得一定要多謝媽媽，佢喺度，我訓練班個心困惑，放心。」最佳女主角由章子怡上台頒發，最後由惠英紅憑住《幸運是我》奪得，小紅姐喺台下激動落淚，同鮑姐攬住，行上台時不慎跌倒。上到台小紅姐話自己好激動，仲按住心口，話自己隻手抽緊筋。小紅姐首先多謝導演，然後就話：「今次點解我咁激動，因為我拍呢套戲係想俾我媽咪，佢有十幾廿年老人癡呆，我拍嗰時，我媽咪攤喺到，飯都唔食。希望大家知道老人痴呆係需人關注。」小紅謂感謝英皇電影老闆楊受成，因為呢個劇本冇人肯要，得英皇不介意。今次係小紅第三次摘金像獎：「我第二次拿獎為自己，因為我唔可放棄自己鍾意嘅工作。我當時緊張到得番九十幾磅，媽咪我想話俾你知我冇丟你架。我媽咪走咗幾個月，我好希望有屋企人同我分享，希望媽咪同我講一聲以我為榮。上次我攞咗獎，我爸爸就走咗。今次我未攞獎，我媽媽走咗。我好想同媽媽講，我冇丟姓惠嘅架。」郭富城上台頒發最佳導演，最佳導演由《樹大招風》三位導演許學文、歐文傑、黃偉傑奪得，而歐文傑係電影《十年》入面《方言》嘅導演，黃偉傑﹕「真冇諗，好感動，好多心血，寰亞唔知咩情況俾咗我哋拍，多謝杜琪峯、游乃海咁有心培育我哋，希望可以繼續拍電影俾你地繼睇。台前幕後演員在心中。好驚今日嚟唔到，太太前三日生咗B，好驚嚟不到，但小朋友好生性，可以等埋佢出院先嚟。」許學文﹕「多謝台前幕後，教過我哋老師，兩位同伴，一齊同行5年。多謝父母細細個帶我去睇，仲有演藝學院，教識我做電影嘅態度，唔係今日唔會係呢度。」歐文傑﹕「多謝《樹大招風》各位工作人員，監製，Elaine，我好難教、好反叛，後期嘅同事。(有人圈佢)我唔會理你，冇諗過攞最佳導演，最後一定要多謝我太太，黃進話劇本喺電影嘅靈魂，雖然你永遠唔會係我劇本嘅靈魂，但你永遠係我嘅劇本，多謝。」趙薇同許鞍華上台頒發最佳兩岸華語電影，由《一路順風》奪得，但冇人上台領獎，頒獎嘉賓許鞍華同趙薇代領。至於最佳動作設計嘅得獎者、《湄公河行動》嘅董瑋同樣因為缺席，由電影老闆代領，最佳動作設計嘅頒獎者梁小龍、陳惠敏、盧惠光上台講述各自入行經過。不過臨睇提名名單時，陳惠敏就講起成龍早前先喺奧斯卡得獎，不過後來有人提佢成龍得到嘅成就獎，梁小龍仲話：「唔好講咁多廢話喇！」許冠文頒發專業精神獎，由海報師阮大勇先生奪得，台上話﹕「講嘢對我最困難，朋友知我唔識講，但為呢個獎，我練習咗一段時間。多謝香港金像獎，頒個咁特別嘅獎俾我，體諒我幾十年嘅努力，香港係福地，天時地利人和同環境，造就我嘅工作——海報。多謝許冠傑、許冠文，麥嘉、泰迪羅賓、施南生、曾志偉等，好多好多，仲有宣傳部主任……，我太緊張嘞，我1975，唔係，係57年嚟香港，今年剛好60年，得到呢個獎係我最大光榮，多謝天上嘅太太，我嘅家庭。」最佳男、女配角分別由《一念無明》嘅曾志偉同金燕玲奪得，其中金燕玲已先後獲十次提名，今次第4次奪獎。金燕玲一開口就喊，好感觸話：「我真係好開心呀，我冇諗過做配角都攞埋金像同金馬獎，係我夢想，好多謝導演，兩個都得28歲，同我女咁上下年紀，就送咁大份禮物俾我。呢幾日諗咗好多，真心好想擺呢個獎，但又唔敢諗，原來呢個世界上一路有人睇住我，好感謝金像獎評審、睇住我嘅人。電影係好緊要，唔理咩角色，一路好好去做就會有人睇到，呢個係我嘅信念。我仲要多謝我個家人同個女，佢好乖，sorry我唔能可以去英國同你一齊生活，因為你好乖我先可以專心拍電影。多謝向太，Mon……金燕玲唔係邊個，因為佢係佢自己。」另外，大會邀請關淑怡、陳奐仁同Supper Moment做表演嘉賓。
|
鍾意就快D Share啦！
|
|
|
