藝人葉翠翠於本月10日誕下囝囝「小王子」，今日在老公周曉東陪伴下與囝囝出院，見翠翠精神飽滿，又沒有水腫，而老公則負責抱BB，不過未踏出門口就電話響起，見他一手抱B，一手拎起電話傾，頓時型爸上身！未幾翠翠接受訪問，周曉東就抱B上車等候，見他雙眼望實BB，不時冧笑，父愛滿瀉！
乳名叫「小東東」
翠翠透露仍未為BB改名，笑謂老公多意見，故將改名交給老公負責，笑指老公要BB與他同名，改乳名叫「小東東」及「Raymond Junior」。被問可有足夠的時間休息？她謂:「呢幾日唔夠，係攰啲，姑娘每隔一個鐘就同我量血壓。」目前仍未可以餵全人奶的她，笑謂老公當BB是屬於他，全程負責餵奶，她笑謂:「佢話等我嚟啦，我熟手啲，你唔識喇，我冇拎過奶樽餵奶，無掃過風！BB一喊佢就好開心，如果半夜喊我睇佢仲笑唔笑得出！」
早前她表示因囝囝提早出世，陪月未能即時上班，不過她今日表示陪月下周就可以上班，老公會請幾天假幫忙照顧BB，又指囝囝好乖，即使喊，拍幾下又安靜下來，又指老公表示覺得囝囝十分似他。
老爺奶奶趕返香港
至於家中長輩可有見過BB？她說:「未，依家喺上海返緊嚟（指老爺及奶奶）！」她透露BB提早出世打亂了計劃，例如原本預訂的普通單人房冇位要臨時改成頭等單人房，擇時辰出世亦被打亂，呻花了不少錢。
她說:「其實我都唔知係咪早產，定係自己大頭蝦計錯時間，因為BB無早產會出現既問題，醫生話無所謂啦，BB健康，我想搞清楚係咪我大頭蝦，下一次再生唔會再犯錯！」
等BB一歲再追女
直言想待仔仔一歲後再追女的她，笑指自己有港姐后冠，因為生女可以留給她，生仔就會比老婆，被問老公有何獎勵，她笑指希望老公做夜更保姆。
她又謂會叫老公安排搵學校的事，她說:「覺得唔係好急，但係要諗下，好似生之前佢都問我洗唔洗咁早洗定啲奶樽，執好走佬袋，好彩我執定喳！」仍在考慮舉辦百日宴的她，謂待回家後安定BB再決定。
|
鍾意就快D Share啦！
|
|
|