「沒女」，顧名思義係「沒有學歷，沒有青春，沒有男人，沒有家底，沒有姿色」嘅女人，喺外在同內在條件都欠奉嘅情況下，唯有屈身於求偶食物鏈最底層，即係一直單身。而無綫熱播劇《全職沒女》 最近亦探討呢個話題，仲搵嚟宅男女神陳瀅扮演慘情「沒女」，吓？女神身邊唔係有好多兵咩？大家咁諗完全錯晒，原來女神私底下相當烏歪，唔怪得嚇走晒啲兵變做「沒女」
「沒女」上身？
無綫官方Facebook專頁「myTV SUPER」近日上載咗短片，同大家睇吓陳瀅嘅「沒女」生活。一開場戴住黑框眼鏡嘅陳瀅，懶洋洋攤喺沙發玩電話、睇漫畫同食嘢，寸步不離張沙發，相當悠閒。點知鏡頭一轉，見到佢成間屋都係垃圾，啱啱食完嘢又唔執勁核突，女神即刻跌晒Watt，就連網友都睇到嘩嘩聲，仲大嗌：「好難頂喎！」
成功問陌生人借錢
好彩陳瀅聽到大家嘅心聲，拿拿臨執番好自己個樣（小編：間屋呢？），瞬間變番又Pure又True嘅女神BB，仲落街測試人氣。陳瀅喺街頭問陌生人借散銀，對方一見到女神即刻暈晒浪，仲將全副身家畀女神，果然色字頭上一把刀！不過有幸握到女神隻手，就算被佢發好人卡話「你真好人」又失財，So what？
兵變！！！
之不過唔係隻隻兵都受呢一套，片尾陳瀅BB唔滿意隻兵帶佢食平民嘢，發爛渣質問對方：「你想我食到入廠？」點知隻兵「兵變」兼將佢一軍，數佢瘋狂收兵嘅衰格事蹟，仲大鬧佢港女性格，最後仲扔低女神走人。一班網友睇完拍爛手掌，大讚呢隻兵係男人之光，仲好心酸話：「最後個幕簡直係每隻兵嘅夢想，可惜現實係......」亦有網友好心痛陳瀅BB做完「沒女」又做港女，怕佢畀人誤會，點會呢！片還片，現實還現實嘛！
網民有話兒：
ChanKelvXXX：嘩！陳瀅做咩咁烏歪，好難頂喎！
XXyceCytXX： 陳瀅素顏都咁靚，頂多係宅女，未去到沒女冇人要咁慘既（嘅）。
MinXXXLai：邊個唔要Jeannie BB咁衰？我要！！！
黃珊X：男人之光！最後個幕簡直係每隻兵嘅夢想，可惜現實係......
|
鍾意就快D Share啦！
|
|
|